Djupdykk i familiealbumet

Arbeidsoppdrag

Lag eit medieprodukt som viser korleis utviklinga av fotografiet har påverka familien din. Ta utgangspunkt i eit utval fotoalbum gjennom generasjonar. Ta gjerne med fotografi i glas og ramme.

Legg vekt på

• korleis fotografia er iscenesette, og kva det seier om korleis personane ønsker å framstå for andre

• korleis fotografia uttrykker tilhøyrsel, meiningar og haldningar

• korleis fotografia har endra seg i overgangen frå analog til digital fototeknologi

• korleis fotografia har blitt distribuerte og delte med andre

• kva sider av livet fotografia dokumenterer, og kva som ikkje er dokumentert

Planlegg medieproduksjonen din

A. Skaff deg bakgrunnskunnskap

Studer fagartiklar på NDLA som gir deg bakgrunnskunnskap til å jobbe med oppgåva:

• Fotografiet erobrar verda

• Fotografihistoria i Noreg

B. Gjer research

I denne fasen må du skaffe deg tilgang til det biletmaterialet du ønsker å undersøke. Hugs at jo eldre bilete du får tilgang til, jo meir spennande blir det å jobbe med oppdraget. Be dei som eig bileta, om å fortelje kven personane på bileta er, når dei vart fotograferte, og kvar og kvifor bileta vart tekne.

C. Gjer utval, reflekter og lag produksjonsmanus

Vel ut fotografi frå ulike tidsepokar som belyser kriteria og problemstillingane i arbeidsoppdraget. Reflekter over kva fotografia fortel om samfunnsforhold, sjølvbilete og kommunikasjon i ulike generasjonar.

Lag eit manus med dei fotografia og kommentarane du vil ha med i produksjonen din.

Produser eit medieprodukt

Vel mellom desse to formata:

• lysbiletevisning med skriftlege kommentarar

• videoforteljing med munnlege kommentarar

Del resultatet

Resultatet deler du med familien din. Det eignar seg perfekt som gåve til jul eller andre høgtider og jubileum!