Skriftleg case – Shake X

På slutten av 90-talet lanserte Tine produkt ved namn OX. Dette var smakstilsette mjølkedrikker som hadde ungdommar som målgruppe. OX-produkta blei likevel ingen stor suksess. Les meir om dette i kjelda nedst.

Shake X derimot er ei norsk verksemd som ønsker å følge ein trend i tida med sunn og naturleg mat og drikke. Dei ønsker å lansere nye typar milkshakar som skal vere tilsette ekstra vitamin og protein. Shake X ønsker å lansere to ulike smakar i første omgang:

• LOL – med smak av bringebær, sitron og guava

• YOLO – med smak av kokos, chili og ananas

Shake X kjøper berre mjølk frå norske bønder og jobbar med sertifiserte berekraftige leverandørar. Verksemda har fokus på berekraftig emballasje og produksjon.

Leverandørar til dei store norske daglegvarekjedene må ofte jobbe hardt for å få innpass i butikkane. Shake X har likevel som mål å få selje hos daglegvarekjedene og har stor tru på produktet sitt. Dei håper og trur at lanseringa deira skal gå betre enn Tine si lansering av OX.

I tillegg til opplysningane i situasjonsskildringa ovanfor må du legge til eigne føresetnader der du meiner det er nødvendig.

Oppgåve 1

Gjer eit målgruppeval for Shake X. Drøft og grunngi segmenteringsstrategien du har brukt.

Oppgåve 2

Kom med forslag til ein distribusjonsstrategi for Shake X. Korleis kan makt og avhengnad i verdikjeda påverke moglege distribusjonsstrategiar?

Oppgåve 3

Gi eit grunngitt forslag til kommunikasjonsstrategi, der du foreslår dagsaktuelle kommunikasjonskanalar for Shake X.