Kan KI lage bilete som representerer ulike epokar?

Del 1: Studer dei to KI-genererte bileta

1. Biletet til venstre er generert i Adobe Firefly med denne instruksen: "Lag eit bilete med motiv som er typisk for renessansen. Det skal ha same djupne som himmelkvelvingen Michelangelo måla i Det sixtinske kapellet."

2. Biletet til høgre er generert med ChatGPT 4o med same instruks: "Lag eit bilete med motiv som er typisk for renessansen. Det skal ha same djupne som himmelkvelvingen Michelangelo måla i Det sixtinske kapellet."

Del 2: Samarbeid i grupper på to–tre elevar

1. Vel ein tidsepoke de har hatt om i kunst- og kulturhistorie. Repeter kva som kjenneteiknar biletkunsten i denne perioden, og noter stikkord. De kan velje mellom desse:

   • Forhistorisk tid

   • Oldtidas Egypt

   • Antikken i Roma

   • Vikingtid

   • Mellomalderen

   • Renessansen

2. Finn eit bilete frå perioden som de vil ha som utgangspunkt for å generere nye illustrasjonar. Vel element i biletet som de vil ta med vidare. Bruk NDLA sin eller ein annan godkjend biletrobot, og samarbeid om å skrive instruks til han. Beskriv motivet de har valt, og det visuelle uttrykket som kjenneteiknar perioden.

   • Kor gode blir bileta roboten genererer ved hjelp av KI?

   • Samanlikn resultata. Diskuter kva bilete som treffer best på epoken og kvifor.

   • Kva legg biletroboten til av eigen stil?

Del 3: Gjett kva epoke

Vel dei to beste biletdøma og la dei andre gruppene gjette kva epoke de har valt. Diskuter kva som gjer at dei klarer å kjenne igjen det visuelle uttrykket frå perioden – eller eventuelt ikkje.

Bruk gjerne karusellmetoden

Halvparten av gruppene står i ein sirkel. Den andre halvparten står i ein sirkel innanfor. Den ytste sirkelen roterer med klokka etter eit gitt antal minutt. Slik får alle gruppene i den ytre sirkelen snakka med alle gruppene i den indre sirkelen.

Del 4: Samanfatt felles i klassen

1. Kva erfaringar gjorde de då de skulle generere tidstypiske bilete frå ulike periodar ved hjelp av KI?

2. Kva synest de om dei KI-genererte uttrykka?

3. Kva kan KI hjelpe oss med, og kva avgrensingar har verktøyet?

4. Diskuter i klassen korleis tidlegare tiders kunstuttrykk kan inspirere oss til å skape våre eigne uttrykk.