Frå utsnitt til teikning
Utstyr
utsnitt av eit bilete (ca. 2 x 2 cm), til dømes frå eit magasin
saks
lim
teikneblyantar i ulike hardleiksgradar
viskeler
teiknepapir: A5- og A3-format
linjal
Sjå gjennom magasin for å finne eit utsnitt som fangar interessa di. Det kan vere spennande former, mønster, teksturar eller flater. Det skal berre brukast som eit startpunkt, så ikkje bruk for lang tid på denne delen. Klipp ut eit utsnitt på cirka 2 x 2 centimeter.
Storleik på teikninga
Storleiken på teikninga di skal vere 148 x 210 millimeter. Dette svarer til eit A5-ark, som du får ved å brette eit A4-ark med dei korte sidene mot kvarandre.
Plassering av utsnittet
No skal du plassere utsnittet ein eller annan stad på A5-arket. Du kan plassere det kvar du vil, og du kan velje kva orientering utsnittet skal ha. Sjå nøye på detaljar, linjer og teksturar. Når du har bestemt deg, limer du utsnittet på arket.
No skal du utvide utsnittet ved hjelp av teikneblyantane dine. Du kan bruke fantasien og lage mønster og flater som ikkje skal førestille noko spesielt, og du står fritt til å lage akkurat den teikninga du vil. La detaljar i utsnittet inspirere til nye former, linjer og overgangar.
Kontrastar mellom lyse og mørke område er noko av det som gjer ei teikning spennande. Prøv å få til mange valørar med dei ulike teikneblyantane, og bruk gjerne ulike skraveringsteknikkar for å skape overgangar og djupne.
Monter teikninga di på eit A3-ark når ho er ferdig.
Skriv eit kort refleksjonsnotat om korleis utsnittet inspirerte deg. Beskriv kva teknikkar du har brukt, og korleis du har jobba med flater, former og valørar.
Relatert innhald
Gråtonane mellom kvitt og svart blir kalla valørar. Lær korleis du kan bruke valørar til å skape djupneverknad i teikningane dine.
Skravering kan brukast for å lage lys og skygge og elles lyse og mørke felt. I denne oppgåva skal du øve på ulike skraveringsteknikkar.