Diskusjonsøvingar

Oppgåve

• Gå saman i grupper på tre.
• Den i gruppa som har fødselsdag først, får ansvaret for å styre diskusjonen.
• Dei to andre i gruppa skal no diskutere eit tema og samtidig øve på ulike ferdigheiter som vi veit bidreg til betre diskusjonar.
• Tredjemann i gruppa passar på at de følger diskusjonsreglane og kjem med tilbakemeldingar etter øvinga. De kan diskutere tilbakemeldingane saman i gruppa etterpå. Kva fungerte bra, og kva kunne vore betre?

• Vel eitt av desse temaa (eller finn på eit eige):

  • ytringsfridom på nett

  • jenter og gaming

  • gutar og psykisk helse

• Bruk litt tid på å førebu dykk på emnet de skal diskutere før de set i gong med sjølve diskusjonen. Skriv ned det du veit om emnet, argument for og i mot, og finn pålitelege kjelder som du kan trekke inn i diskusjonen.

Gjennomføring

Vel ein gjenstand (ein blyant, eit samankrølla ark) som skal vere ein slags stafettpinne for snakking. Det er berre lov å snakke når du held denne. Dette kan gjere det enklare å øve på å lytte til kvarandre utan å avbryte. Den som har ansvaret for å styre diskusjonen, passar på at gjenstanden blir overlevert på ein god måte, slik at begge får snakke utan avbrytingar.

Byt på å dele synspunkt om saka de har valt. Skriv gjerne ned hjelpesetningane og bruk dei i diskusjonen.

Diskusjonsreglar

1. Vis at du lyttar og har forstått partnaren ved å prøve å gjenta hovudpoenget til den andre.
   Hjelpesetningar:

   • Det du meiner er altså at …

   • Eg forstår det slik at du seier at ...

2. Bygg på kvarandre sine synspunkt.
   Hjelpesetningar:

   • Eg vil legge til det du seier …

   • Kva om det du seier er …

   • Eg høyrer kva du seier, og eg trur at dette kan bety at ...

3. Vis når du er ueining, men utan å angripe personar eller ved å vere usakleg. Vis òg at du set pris på at andre kjem med synspunkta sine, sjølv om dei er ueinige med deg.
   Hjelpesetningar:

   • Eg er ueinig med deg i dette, fordi eg meiner at ...

   • Det er viktig at du kjem med meininga di, fordi det gjer at eg ser ...

4. Pass på kroppsspråket ditt. Å himle med auga, flire eller sitje med armane i kors kan verke respektlaust og avvisande.

5. Be den andre om å utdjupe synspunkta og påstandane sine. Det kan bidra til at de lyttar meir merksamt til kvarandre. Det kan òg rydde opp i misforståingar.
   Hjelpesetningar:

   • Kan du fortelje meg meir om ...?

   • Kva slags kunnskap eller kjelder bygger du denne påstanden på?

   • Kan du forklare kva du meiner med ...?