Utvikle salsmiljøet

Oppgåve 1: Det ytre salsmiljøet

Du har fått jobb som butikkmedarbeidar i ein skobutikk som skal flytte inn i nye lokale. Lokala ligg i ei travel handlegate og har store utstillingsvindauge ut mot fortauet, med inngangsdøra plassert midt på fasaden. Dagleg leiar veit at du er kreativ, og har bede deg om å forme ut det nye ytret salsmiljøet for å trekke flest mogleg kundar inn i butikken.

Del 1: Design det ytre salsmiljøet

Bruk kunnskapen din om det ytre salsmiljøet til å lage ei skisse av fasaden. Målet er å skape eit blikkfang som skil seg ut i handlegata. Når du teiknar, må du vurdere korleis skilting, fargeval og vindaugsutstillingar kan spele saman for å ønske kundane velkommen. Tenk òg over andre element ved inngangspartiet som kan bidra til å stoppe dei forbipasserande og freiste dei til å ta turen inn.

Del 2: Presentasjon og faglege val

Gå saman i grupper og presenter skissene for kvarandre. Under presentasjonen skal du forklare idéen din og grunngi dei faglege vala du har gjort for fasaden, utstillinga og heilskapsinntrykket.

Grunngi vala de har gjort.

Oppgåve 2: Det indre salsmiljøet

Vel ein av casane nedanfor:

Case 1

Du skal opne ein ny skobutikk i gågata i byen. Butikken har eit breitt utval av sko til alle aldersgrupper, og det er viktig at skoa blir riktig eksponerte. Lokalet er kvadratisk, omtrent hundre kvadratmeter (10 m x 10 m). Det er vindauge på éin vegg, og inngangsdøra er midt på denne veggen. Ta elles eigne føresetnader, bestem årstid og sortiment og lag ei skisse av korleis det indre salsmiljøet skal formast ut. Du skal òg plassere ut varene.

Case 2

Du har fått i oppgåve å innreie ein butikk som skal selje kosmetikk til jenter (unge damer). Butikken ligg i eit kjøpesenter. Lokalet er sju meter langt og sju meter breitt. Teikn ei skisse og beskriv innreiing, fargar, stil, utstillingar, vareplassering og så vidare.

Case 3

Du har fått i oppgåve å innreie ein butikk som skal selje produktet X. Vel produkt sjølv og beskriv målgruppa. Fortel kvar butikken skal ligge, og korleis lokalet verkar (storleik, omgivnader og så vidare). Beskriv korleis du vil forme ut butikken. Teikn ei skisse og beskriv innreiing, fargar, stil, utstillingar, vareplassering og så vidare.

Case 4

Du har fått i oppgåve å innreie ein butikk for gamingutstyr. Butikken skal ligge inne på eit stort og nytt kjøpesenter og vere cirka 200 kvadratmeter. Det er viktig at målgruppa trivst og kan prøve nye produkt som kjem til butikken. Teikn ei skisse og innrei etter eige ønske når det gjeld fargar, stil, utstillingar, vareplassering, og så vidare.

Oppgåve 3: Vurder og vidareutvikle eit salsmiljø

I denne oppgåva skal de ut og vurdere det ytre og indre salsmiljøet til ein lokal butikk. Deretter skal de analysere funna, skrive ein rapport og bruke kreativiteten til å designe nye salsfremmande tiltak for butikken.

Del 1: Førebuing

Lag eit evalueringsskjema

Gå saman i grupper og lag eit evalueringsskjema (sjå dømet under). Skjemaet skal innehalde ulike element ved det ytre og indre salsmiljøet, som plassering, fasade, inngangsparti, service, reinhald og kopling til andre salskanalar (som nettbutikk).

Lag felles vurderingskriterium med kolonnane "Bra", "Greitt nok", "Dårleg" og "Tiltak". Alle i gruppa tek med seg kvart sitt skjema på butikkbesøket.

Del 2: Butikkbesøk og observasjon

Oppsøk den valde butikken i nærområdet. Hugs å presentere dykk høfleg og spørje om det er greitt at de gjer ei lita undersøking. De kan òg spørje om å ta nokre bilete, men pass på at de ikkje får med kundar eller tilsette på bileta.

Gjer individuelle observasjonar og fyll ut kvart dykkar evalueringsskjemaa undervegs. Legg merke til korleis de opplever servicen, reinhaldet, ordenen og heilskapsinntrykket av butikken.

Når de er tilbake i klasserommet, samanliknar de skjemaa i gruppa. Om de har vurdert punkta ulikt, diskuter kvifor de opplevde butikken forskjellig. Saman formar de ein kort presentasjon av salsmiljøet til butikken ut frå det de fann ut.

Del 3: Skriv ein statusrapport

Med utgangspunkt i observasjonane og diskusjonen i gruppa skal de skrive ein skriftleg rapport om salsmiljøet til butikken. Rapporten skal òg gi ei ærleg vurdering av kva som er bra og mindre bra når det gjeld service, reinhald, marknadsføring og den totale kundeopplevinga.

Del 4: Utarbeid nye salsfremmande tiltak

Tenk at butikken ønsker vekst og vil satse sterkare på meirsal og gjensal. No skal de bruke fantasien og digitale verktøy til å fornye butikken:

1. Teikn ein ny layout for det ytre og indre salsmiljøet i butikken ved å bruke eit digitalt teikneprogram (som til dømes Sweethome 3d).

2. Skissa skal innehalde eit eige "salstorg" for ei valfri kampanjevare som skal stillast ut i fire veker. Teikn inn relevante meirsalsprodukt som bør plasserast i tilknyting til dette torget.

3. Lag eit utkast til eit salsfremmande innlegg i sosiale medium (som Instagram eller Snapchat) tilpassa kampanjen.

Del 5: Presenter for klassen

Avslutt oppgåva med å presentere løysingane for klassen. Grunngi dei faglege vala de har gjort for både layout, kampanje og sosiale medium.