Fagstoff

Introduksjon: Vakre Vestlandet

Vestlandet er kjent for vakker natur med djupe dalar og høge tindar. Korleis er landskapet danna, og korleis taklar små stader hundretusenvis av turistar? I denne casen bruker vi Loen som utgangspunkt for å forstå korleis landskapet er danna, og sjå korleis masseturisme påverkar ein liten plass.

Gondol som kjem opp på fjellet, til høgre. I bakgrunnen eit flott fjordlandskap med djupe dalar og snøkledde fjell. Foto. — Bilete frå toppen av gondolen ved Loen. Nede til venstre er Loen med Lovatnet bak, og midt i biletet er Olden.

Læringsmål

Etter å ha jobba med heile casen skal du kunne

forklare korleis ytre krefter kan skape erosjonsformer og avsetjingsformer
forklare hovudtrekka i danninga av fjordlandskapet på Vestlandet
diskutere moglegheiter og utfordringar ved turisme
peike på og vurdere verdien av ulike naturressursar og landskapsverdiar

Tidsbruk

Fem økter på 90 minutt kvar.

Tips til læraren

Oppgåvene er det sentrale i desse casane, for då får elevane jobbe med fagstoffet og kople det til ein konkret stad.

Casen er strukturert i ei logisk rekkefølge. Fagstoffet du treng for å løyse oppgåvene, ligg framfor oppgåvene i strukturen.

Éin måte å jobbe med denne casen på er at du som lærar går gjennom fagstoffet før elevane jobbar med oppgåvene. Då kan du plukke ut det viktigaste slik at de kan spare litt tid og få meir tid til oppgåvene.

Ein av fleire casar

Dette er ein av to casar med utgangspunkt i Loen og ein av åtte casar med utgangspunkt i ein konkret stad. Det er mogleg å undervise heile geografifaget med utgangspunkt i desse åtte casane.