Fagstoff

Introduksjon: Klimaendringar og robuste byar

Korleis kan vi sikre byane våre mot naturfarar og eit klima i endring? I denne casen lærer du meir om klimasystemet, klimatilpassing og førebygging av naturfarar i byområde ved å ta utgangspunkt i Trondheim.

Dam og gangbru i eit grønt parkområde. Foto. — I Iladalen park er bekken som tidlegare låg i røyr, opna opp igjen. Det bidreg til å dempe flaum og er bra for det biologiske mangfaldet.

Læringsmål

Etter å ha jobba med heile casen skal du kunne

forklare det grunnleggande ved klimasystemet
forklare korleis ulike område blir påverka ulikt av klimaendringar
diskutere kva tiltak byar og byområde kan og bør innføre for å tilpasse seg klimaendringar og redusere klimagassutslepp
forstå korleis naturfarar påverkar byområde, og at dette kan påverke bruken av areala

Tidsbruk

Tre økter på 90 minutt kvar.

Tips til læraren

Oppgåvene er det sentrale i desse casane, for då får elevane jobbe med fagstoffet og kople det til ein konkret stad.

Casen er strukturert i ei logisk rekkefølge. Fagstoffet du treng for å løyse oppgåvene, ligg framfor oppgåvene i strukturen.

Éin måte å jobbe med denne casen på er at du som lærar går gjennom fagstoffet før elevane jobbar med oppgåvene. Då kan du plukke ut det viktigaste slik at de kan spare litt tid og få meir tid til oppgåvene.

Byt ut nærmiljøet med Trondheim

Vi tilrår at de bruker Trondheim som utgangspunkt i oppgåvene, òg der det står "bruk nærmiljøet". På den måten kan fagstoffet knytast til ein konkret stad, og de kan aktivt bruke filmen og ressursane som ligg i oppgåva "Bli kjend med Trondheim".

I oppgåva "Feltarbeid: Klimatilpassing i nærområdet" kan de òg bruke Google Street View, Google Earth i 3D og liknande program når de skal "ut" for å finne døme på klimatilpassing.

Ein av fleire casar

Dette er ein av tre casar med utgangspunkt i Trondheim og ein av åtte casar med utgangspunkt i ein konkret stad. Det er mogleg å undervise heile geografifaget med utgangspunkt i desse åtte casane.