Norsk Gartnerforbund

Norsk Gartnerforbund

Norsk Gartnerforbund er ein politisk uavhengig medlemsorganisasjon og skal vere eit bindeledd mellom alle gartnarar i Noreg. Dei jobbar for at heile gartnarnæringa skal ha gode rammevilkår, og du kan bli medlem anten du produserer frukt, bær, grønsaker, blomstrar eller tre.

Kva jobbar Norsk Gartnerforbund med?

Organisasjonen jobbar opp mot både styresmakter, privat næringsliv og enkeltmedlemmer. Dei set norsk gartnarnæring på dagsorden i media og har god kontakt med stortingspolitikarar om saker som påverkar næringa.

Tollvern

Gartnarforbundet jobbar aktivt for at produkt frå norske gartnarar skal få mindre konkurranse frå utlandet. Det gjer dei ved å påverke norske styresmakter til å legge toll på dei utanlandske produkta.

Klima og energi

Gartnarforbundet jobbar med energieffektivisering og klimatiltak hos norske gartnarar. Medlemmer får gratis rådgiving på feltet. Gartnarforbundet forhandlar òg fram gunstige avtalar med energiselskapa på vegner av veksthusnæringa.

Plantevern og plantehelse

Gartnerforbundet er oppteke av at norske planter skal vernast mot alvorlege planteskadegjerarar frå utlandet, og at vi generelt skal ha god plantehelse.

Produsentsamarbeid

Gartnerforbundet organiserer samarbeid mellom gartnarar med felles produksjon. Døme på dette er Tomatklubben, Julestjerneklubben og Ferdigplengruppa. Formålet er å styrke samarbeidet og gjere norske gartnarar meir konkurransedyktige.

Jordbruksoppgjer

Gartnerforbundet taler saka til gartnarane i jordbruksoppgjeret og gir innspela sine til Landbruks- og matdepartementet, Norges Bondelag og Norsk bonde- og småbrukarlag.

Lokallag

Norsk Gartnerforbund har 15 lokallag spreidde over heile landet, dei fungerer som lokale møteplassar for medlemmene. Lokallaga arrangerer jamleg møte, fagkveldar og praktiske feltbesøk der gartnarar kan utveksle erfaringar og diskutere lokale utfordringar.

Fagblad

For å halde medlemmene oppdatert på nyheiter og utviklinga i bransjen gir Norsk Gartnerforbund ut to fagblad: Gartneryrket og park & anlegg. Gartneryrket er fagbladet for produsentar i norske gartneri og hagebruk, mens park & anlegg er fagbladet for alle som jobbar med grønanlegg og landskap i Noreg.