Tverrfagleg case – vaktselskap
Case
Kristine, Hanne og Roar har kjend kvarandre sidan vidaregåande. Alle tre har teke fagbrev i sikkerheitsfaget og deretter starta vaktselskapet Atlanten Security. Bedrifta spesialiserer seg på inngangskontroll for lokale bedrifter og arrangement i lokalsamfunnet.
I fjor hadde dei eit solid overskot, og dei har bestemt seg for å bruke dette til å utvide verksemda. I tillegg til manuelt vakthald skal dei tilby tekniske sikkerheitstiltak som alarmar og kameraovervaking til bedrifter. Derfor treng dei å tilsetje fleire medarbeidarar.
Oppgåve
Del 1
Med fleire medarbeidarar treng Atlanten Security å få på plass eit verneombod.
Kva slags bedrifter er pliktige til å ha eit verneombod, og kva inneber det?
Kva for andre partar er det aktuelt å samarbeide med for å utvikle eit betre arbeidsliv?
Del 2
Kva for regelverk for helse-, miljø- og sikkerheitsarbeid må verksemder som driv inngangskontroll følge?
Forklar korleis dei kan gjennomføre og dokumentere arbeid i samsvar med gjeldande regelverk.
Del 3
Atlanten Security ønsker å bygge seg eit nettverk i lokalsamfunnet.
Korleis kan dei bygge relasjonar i lokalsamfunnet?
Kva betydning kan eit slikt nettverk ha?
Del 4
Atlanten Security har fått eit tilbod om å kjøpe inn 500 alarmar med sensorar til 200 kroner per eining. Dei bereknar 20 prosent i påslag for indirekte kostnader. Vel sjølv ei fornuftig forteneste. Meirverdiavgifta er på 25 prosent.
- Bruk sjølvkostmetoden til å rekne ut salspris inkludert meirverdiavgift for ein alarm med sensorar, utan montering.
- Kva vil det seie å setje ein pris som tek omsyn til marknadssituasjonen?
Del 5
Korleis skal Atlanten Security marknadsføre og selje den nye tenesta?
- Lag ein marknadsplan, som inneheld målgruppe, ansvarsfordeling og tidsskjema.
- Gjer greie for salsprosessen.