Ulemper ved vegtransport
Ei stor mengd bilar fører med seg både trafikkulykker og miljøulemper. Styresmaktene arbeider ut frå ein nullvisjon i trafikksikringsarbeidet. Nullvisjonen er definert slik: 0 drepne og 0 hardt skadde i trafikken.
Nullvisjonen handlar om
- å arbeide for å unngå trafikkulykker med alvorlege konsekvensar
- å sikre eit akseptabelt risikonivå i vegtrafikken
I arbeidet med å redusere risikoen definerer styresmaktene risiko slik:
Ulykkesrisiko = sannsyn for ulykke x konsekvens av ulykke.
Sannsyn for ulykke heng saman med forhold ved:
- føraren (trøyttleik, om ein følgjer med, konsentrasjon, distraksjon, erfaring m.m.)
- teknisk stand på køyretøyet (bremsar, dekk m.m.)
- friksjonen mellom hjula på køyretøyet og vegbana (vêret – liten friksjon ved is på vegen, betre friksjon på tørt sommarføre)
- vegbana (svingar, helling, sikt)
- trafikkmiljøet (oversiktleg, uoversiktleg)
Konsekvensen av ei ulykke heng saman med den samla bevegelsesenergien som er involvert i ulykka.
Denne avheng igjen av massa og farten til køyretøyet (bevegelsesenergi = ½ x masse x fart2). Dette er det same som du lærte under føraropplæringa – om du doblar farten, firedoblar du bremselengda. Men du firedoblar også bevegelsesenergien, og dermed konsekvensane av ei ulykke.
I arbeidet for å auke tryggleiken på vegane set styresmaktene i verk ei lang rekkje tiltak for å redusere sannsynet for uhell og alvoret ved uhell.