Mijjen dajveh
Mijjen dajveh
Daah leah mijjen dajveh, mijjen vaerieh. Daajkoe leah mijjen maadter-aahkah jïh maadter-aajjah jealeme, orredamme jïh vaarredamme.
Daajkoe leah annje dålle-sijjieh jïh gööth-sijjieh gaavnoes. Gelliem lehkiem maehtibie vaedtsedh jïh dellie vuajnajibie: «Daagkoe leah gujht aerebi aaj baalkah orreme.»
Maahtah tjihkedidh lïegkedidh, juelkien seejkh, dïhte jis derhviem tjïektjeste, – dellie aernh-gierkieh jijhtieh. Dïsse maahtah dållem bïejedh jïh daejredh:
«Daesnie leah mov almetjh aerebi aaj dållebealesne tjahkasjamme, lïegkedamme. Daestie leah daejtie seamma vaeride vuartasjamme mejtie manne daelie vuajnam.»
Maadtoen dajveh, maadtoen vaerieh.
Mijjen dajveh, mijjen vaerieh.
Mov dajveh, mov vaerieh.
Gaaltije
Jaahkenelkien Aa. (1996). Luste lohkedh. Samisk Utdanningsråd.