Estetihkeles dååjresh

Maam mijjieh domtebe jïh dååjrebe gosse maam joem tjaebpie vuejnebe, govlebe jallh damtebe, maehtebe estetihkeles dååjresinie gåhtjodh. Vuesiehtimmien gaavhtan gosse guvviem vuartasjibie, musihkem goltelibie jallh tjeahpoe-daeverem gïetine damtebe.

Teaterem jallh filmem vuartasjidh aaj mijjese dååjresh jïh domtesh buektieh, mah mijjese buerie jïh aaj nåake. Guktie mijjieh maam joem dååjrebe maahta gellielaakan årrodh jïh sjïerelaakan almetjistie almetjasse.

Tjiehpies-lidteratuvren tjaelijh teeksth soptsestieh jïh tjaelieh juktie almetji domtesh jïh estetihkeles dååjresh gåaskodh.

Kultuvre jïh seabradahke gusnie mijjieh jielieminie mijjiem hammoedieh, maam tuhtjebe tjaebpie jïh hijven, jïh aaj maam ibie tuhtjh dan tjaebpie jallh hijven. Mij lea sjïere jïh sïejhme daajroe jïh maahtoe saemien kultuvresne saemiej vuajnoem hammoedieh, jïh aaj estetihkeles vuajnoem.

Vuesiehtimmien gaavhtan gaptan klaerieh jïh hammoeh soptsestieh guktie saemiej estetihkeles vuajnoe. Seammalaakan jeatjah vætnoejgujmie, guktie dah ïebnh, maallh, hammoeh jïh tjaalehtjimmieh. Naemhtie aaj saemien musihkine, mij joejkemistie gïerehtovveme. Gosse saemien gïelen bïjre ussjedibie, dellie gïelem gellielaakan gåhtjobe goh vaajmoe-gïele, ietnien-gïele jïh gullie-gïele.

Mijjen vuajnoe jïh domtesh saemien dajvide aaj joekoen, jïh saemien kultuvreste jïh jielemevuekeste båetieh. Daan biejjien mijjen vuajnoe vååjnesasse båata gosse tjoerebe eatnemem vaarjelidh jeatjah stoereseabradahken ïedtji vööste.

Naemhtie estetihkeles vuajnoeh gellielaaketje. Dovne sisvege, hammoe jïh gïele estetihkeles domtesh jïh dååjresh mijjese buektieh.