Draaman manuskripte
Vuesiehtimmie dorjehtimmeste Raahkele-Pïere maam Albert Jåma tjaaleme.
1. Boelhke:
1. Scena:
Soptsestæjja: Gïetine saevehte jïh jeahta:
Daate vuesiehtimmie ålvas guhkede dovletjistie. Dehtie aejkeste gåessie saemieh vïenhtin sijjieh oktegh Saemie-eatnamisnie veasoeminie.
Naakenh saemijste låavthgåetien sisnie, jïh naakenh bïjre jarkan ostedalleminie. Joejkeminie lustestalleminie. Raeffie lij. Maanah stååkedeminie.Akte nyjsenæjja joejkeminie hearlohke Saemie-eatnemen bïjre.
Nyjsenæjja:
Vuemieh dïeves vijrijste
naa, naa…
johkh dïeves loesijste
naa, naa…
stööhtjiste veljije
naa, naa…
gedtiste veljije
naa, naa…
bovtseste aaj
naa, naa…
Draaman åejvie-teekste aaj draama-dialogem gohtjesåvva juktie daesnie göökte jallh gellie almetjh soptsestellieh. Jis ajve akte råålla-gaagkoe soptseste, dellie dïhte monologe.
Scena-buerkiestimmieh bielie-teekstesne vihkeles bïevnesh mijjese vedtieh gusnie jïh gåessie mij akt heannede, jïh guktie scene vååjnoe. Naan draamah eah bielie-teeksth utnieh jïh dellie regisööre åådtje nænnoestidh guktie edtja årrodh. Jeatjah draamah guhkies bielie-teeksth utnieh gusnie jïjnjh buerkiestimmieh.
Regissööre nænnoste jis sæjhta buerkiestimmide vihtiestidh jïh guktie edtja dejtie toelhkestidh.
| Saemien | Daaroen |
|---|---|
| åejvie-teekste | hovedtekst |
| bielie-teekste | sidetekst |
| scena-buerkiestimmie | sceneforklaring |
| råålla-gaagkoe | rollefigur |