Skip to content
Article

Gåetie-luhpiem gaavnedh

Minngemes skuvle-jaepien mænngan gellie noerh aelkieh barkedh jallh jïlle-skuvlesne lohkedh. Daelie Aanta gåetie-luhpiem ohtsedeminie jïh sjïehteles gåetieluhpie-bïevnesem gaavneme.
Almetje mobijle-telefovnesne syökeminie. Ajve almetjen gïeth mah vååjnoes. Guvvie.
Image: Tom Knudsen / CC BY-SA 4.0

Daelie lïerh

  • gåetie-luhpien bïjre

    • gihtjedh jïh vaestiedidh

    • soptsestidh jïh tjaeledh

Goltelh jïh lohkh!

Aanta jïh Næjla edtjijægan seamma sæjjan juhtedh. Aanta edtja jïlle-skuvlesne aelkedh lohkedh. Næjla edtja bïjlevierhkie-sijjesne barkedh. Gåabpatjahkh gåetie-luhpiem ohtsedeminie. Goltelh gosse sinsitnine soptsestalleminie.

Gåetie-luhpiem gaavnedh

Aanta: Datne gåetie-luhpiem gaavneme?

Næjla: Im leah! Nååts datne?

Aanta: Ohtsedamme, men im daejrieh annje. Sjïehteles gåetieluhpie-bïevnesem gaavneme. Daan iehkeden edtjem lååjkerdæjjese ringkedh gihtjedh.

Næjla: Gusnie dïhte gåetie-luhpie jis? Dov skuvlen lïhke, vuj tjoerh bussine skuvlese dåeriedidh?

Aanta: Gåetie-luhpie skuvlen lïhke.

Næjla: Man dovrehke dellie?

Aanta: Naa dovrehke, fïerhten asken åvteste 6 500 kråvnah.

Næjla: Kaanne maehtien dellie ektesne leejjestidh?

Aanta: Ij gåaredh, bïevnesinie tjåådtje gåetie-luhpie ajve akten almetjasse.

Næjla: Ov dellie gaatesjen!

Baakoeh
gåetie-luhpie
bolig, husvære
gåetieluhpie-bïevnese
bolig-annonse
leejjestidh
leie
lååjkerdæjja
utleier
Ov dellie gaatesjen!
Å, det var synd!
Gyhtjelassh

  1. Gie sjïehteles gåetieluhpie-bïevnesem gaavneme?

  2. Gïese Aanta edtja ringkedh?

  3. Man bïjre Aanta edtja gihtjedh?

  4. Gusnie dïhte gåetie-luhpie?

  5. Man dovrehke lea?

  6. Man gellie almetjidie gåetie-luhpie?

  7. Maam Næjla tuhtjie dan bïjre?

Soptsesth!

Guktie gåetie-luhpie?

Vuartesjh guvviem jïh illustrasjovnem. Soptsesth guktie dïhte gåetie-luhpie!

Veelkes gåetieh. Guvvie.
Image: Erik Johansen / CC BY-NC-SA 4.0
Gåetie-guvviedimmie mah bijjelistie vååjnoes. Guvvie.
Image: Thomas Bedin / CC BY-SA 4.0

Tjaelieh!

Tjaelieh guktie gåetie-luhpie jïh buerkesth aaj man åvteste dïhte sjïehtele!