Biejjie-niejten sealadimmie

Båassjoen baalte vealan gåetesne
Biejjien niejte, Njaeviesietnie
Sæjloes jielemen løøvles vaejvijste
Haeliedeminie, jeatja sæjjan
Sæjhta Raerien aehtjiem vuejnedh
Biejjiem ååhtsa, altese Aehtjiem
Hovre-gallesh, jotni fæjjoe
Jaememen aajmoem vuertieminie,
Båassjoen baalte vealan gåetesne
Biejjien niejte — Njaeviesietnie

Gedtie bovtsh lea deememe
Vedtieji Biejjien maanide
Vuelkieminie minngemes raadtan
Seangkoegietjesne baernie tjåådtje
Bahhas Hatsvesietnien buvvije
Juelkiegietjesne niejte tjåådtje
Hatsvesietnien noere niejte

Biejjien faavroes niejte låasa
Jallan govloes, viesjies giele
Goltelh maanah, mujhtieh baakoeh!
Biejjien faavroes niejte jeahta:
Biejjie luajhtede, jijje båata
Eatneme gaptjelge sjuevnjedisnie
Gaptjede tjaebpies Saemieeatneme
Aerede båata, ij goh nimhtie?

Biejjie luajhtede, vaejsjie båata
jijjen njaaka bivteminie
tjiekedahta sjuevnjedisnie
Aerede båata, ij goh nimhtie?
Biejjie luajtede, ealoe ånnene
Moenehke lakta, gårmah laarieh
Maanah vaedtsieh sjuevnjedisnie
Aerede båata, ij goh nimhtie?
Biejjie luajhtede. Jåhta maaje.
Biejjien niejte Biejjien gåajkoe.
Vaalta Biejjien maanah mealtan
Aerede båata, ij goh nimhtie?^[1]