Transitijve jïh intransitijve verbh
Verbi transitiviteeten bïjre
Verbh mah objektem vaeltieh leah transitijve verbh. Verbh mah eah objektem vaeltieh leah intransitijve. Muvhth jis verbh maehtebe dovne transitijve jïh intransitijve verbine nuhtjedh.
Transitijve verbh
Transitijve verbh ryöktesth objektem vaeltieh, v.g. tsaekedh. Akten-taalen ryöktesth objekte iktegisth akkusatijvesne, minngie-gietjine –m.
tsaekedh (transitijve)
Dïhte tråajjam tsaaka.
tråajjam – akten-taalen ryöktesth objekte (RO), akkusatijvesne
Gellien-taalen objekte nominatijvesne minngie-gietjine –h, jallh akkusatijvesne minngie-gietjine –ide/–jde/–idie.
tsaekedh (transitijve)
Dïhte gaamegh tsaaka.
Dïhte gaamegidie tsaaka.
gaamegh – gellien-taalen ryöktesth objekte (RO), nominatijvesne
gaamegidie – gellien-taalen ryöktesth objekte (RO), akkusatijvesne
Muvhth transitijve verbh maehtieh ryöktesth objekten lissine ov-ryöktesth objektem illatijvesne aaj utnedh. Daagkerh verbh distransitijve verbine, v.g. vedtedh.
vedtedh (ditransitijve)
Manne beapmoem bïenjese vadtam.
beapmoem – akten-taalen ryöktesth objekte (RO), akkusatijvesne
bïenjese – ov-ryöktesth objekte (OR-O), illatijvesne
Intransitijve verbh
Intransitijve verbh eah ryöktesth objektem vaeltieh, v.g. gåårvedidh.
gåårvedidh (intransitijve)
Dïhte gåårvede.
Transitijve jïh intransitijve verbh
Muvhth jis verbh maehtebe dovne transitijve jïh intransitijve verbine nuhtjedh, v.g. byöpmedidh.
byöpmedidh (transitijve jïh intransitijve)
Manne aereds-beapmoem byöpmedem. (transitijve)
Manne byöpmedem tsåahka gaektsie. (intransitijve)
Jïjnjh aaj verbh mah transitijve jïh intransitijve verbine juakeldh seerkeme-gietjiejgujmie, v.g. rïhpestidh jïh rïhpesidh.
–stidh:
rïhpestidh (transitijve)
Manne oksem rïhpestem.
–sidh:
rïhpesidh (intransitijve)
Okse rïhpese.
1. laavenjasse
2. laavenjasse
Tjaelieh raajesem fïerhten verbese.
båetedh
vuejnedh
lohkedh
viehkiehtidh
bïssedidh
daejredh
bïejedh
ussjedidh
måarahtovvedh
aavoedidh
dåeriedidh
åestedh
bårrestovvedh
tjahkasjidh
jovkedh
goerehtidh
buerkiestidh
vaadtsehtjidh
3. laavenjasse
Vaestedh jïh buerkesth mannasinie.
Mah verbide transitijve?
Mah verbide intransitijve?
Mah verbide ditransitijve?
Mah verbide maehtebe dovne transitijvine jïh instrasjitjvine nuhtjedh?
4. laavenjasse
Goerehth verbide jïh guktie dah åarjelsaemien teekstine nuhtjesovveme.
bueriedidh
buaranidh
vuejnedh
vååjnedh
gihtjedh
gihtjesovvedh
Viehkie:
Tjaangh Oahpa:n gaskeviermie-sæjrose: Nedtedigibaakoeh. Tjaelieh verbem jïh diedtesth: Ohtsh.
Verbe transitijve vuj intransitijve? Mah bïevnesh verben bïjre gaskeviermie-sæjrosne gaavnh?
Diedtesth Teksth jïh tjaangh Korp:se (åarjel-saemien korpusasse).
Veeljh vuesiehtimmie-raajesh jïh buerkesth guktie dah verbh nuhtjesovveme korpusisnie.
5. laavenjasse
Guktie transitijve jïh intransitijve verbh nuhtjedh? Buerkesth.