Om filmen
Dokumentarfilmen Gender Me presenterer oss for historiene til fleire homofile med muslimsk bakgrunn.
Mansour Saberi er homofil flyktning frå Iran. Han har budd i Noreg i snart 20 år. Gjennom filmen følger vi Mansour på besøk hos dragartistar i Istanbul. Vi blir òg med då han får besøk av den homofile imamen Daayiee Abdullah.
Gender Me er laga av den tyrkisk-norske filmskaparen Nefise Özkal Lorentzen. Filmen er den første filmen i Lorentzens dokumentarfilm-trilogi om islam og kjønn. Dei to andre filmane i trilogien er En ballong til Allah og Manislam.
Homofili og islam
Gender Me løftar viktige problemstillingar knytte til islam og seksuell legning. Filmen viser mellom anna kor vanskeleg det er å stå fram som homofil i islam.
Det finst framleis strengt religiøse land i verda der homofile kan bli dømde til døden på grunn av legninga si. På grunn av dette flyktar fleire muslimske homofile frå heimlandet. Andre vel å skjule den seksuelle legninga si, eller dei prøver å undertrykke ho.
Gjennom Mansours menneskemøte i filmen får vi ta del i sterke historier om eit tabubelagt tema, historier som sjeldan har vorte fortalde tidlegare.