Jåarhke-skuvlen mænngan
Daelie lïerh
baakoeh jïh jiehtegh ovmessie barkoej bïjre.
naan ööhpehtimmiej bïjre.
naan barkoej bïjre.
Meerje jïh Aanta gåalmadinie klaassesne jåarhke-skuvlesne. Gåabpatjahkh lissie-barkoem åådtjeme, men jeatjah barkoeh leah dej nïekeds-barkoeh. Goltelh soptsestallemem dej gaskemsh.
Meerjen jïh Aantan nïekeds-barkoeh
Meerje: Aanta, mah datne lissie-barkoem åådtjeme?
Aanta: Nov sån, naan biejjieh skuvlen mænngan beapmoe-bovresne barkem, jïh naan hïeljh manne doemesjæjja juelkietjengkere-gæmhpojne. Ikth våhkosne saavrehtæjja noeride gïeh ajve göökte jaepieh nuerebe manneste, men im beetnegh dïenesjh saavrehtæjjine. Tuhtjem barre luste.
Meerje: Dutnjien gujht sjeahta gellie lissie-barkoeh utnedh. Mov aaj lissie-barkoe daelie. Fïerhten hïeljen hoksehtæjjine barkem.
Aanta: Mah dejne murredh?
Meerje: Murredem hov, men ij amma dïhte mov nïekeds-barkoe.
Aanta: Mij dov nïekeds-barkoe dellie?
Meerje: Sïjhtem kreeke-dåaktarinie barkedh. Ussjedem sijjiem ohtsedidh NMBU:sne, dïhte aajnehke universiteete Nöörjesne mij dam ööhpehtimmiem åtna.
Aanta: Jöödtedh, dellie joekoen buerie karakteerh daarpesjh. Kaanne datne åarjese Åsen gåajkoe jåhtah jåarhke-skuvlen mænngan.
Meerje: Jis sijjiem åadtjoem. Maam datne ussjedh darjodh?
Aanta: Datne gujht daajrah mov nïekeds-barkoe lea profesjonelle juelkietjengkere-tjïektjijinie sjïdtedh. Men sïjhtem aaj saemien-gïeline barkedh. Dïhte hov vihkeles munnjien.
Meerje: Guktie dellie? Lohkehtæjjine?
Aanta: Im daejrieh annje. Ussjedem kaanne jarkoestæjjine. Maahtam saemien gïelem Romsan universiteetesne lohkedh, jïh dan mænngan kaanne barkoem Giellateknosne ohtsedidh. Tuhtjem gieltegs govloe Giellateknosne barkedh.
Meerje: Skuvlesne mijjieh hov nedte-sæjroem Nedtedigibaakoeh daamtaj nuhtjebe, maam Giellatekno dorjeme. Jåarhke-skuvlen mænngan kaanne datne jis noerhtese Romsese jåhtah.
Aanta: Datne åarjese jïh manne jis noerhtese.
Vaestedh!
Magkerem lissie-barkoem Meerje åtna?
Mij lea Meerjen nïekeds-barkoe?
Mennie universiteetesne ööhpehtimmie gååvnese dan barkose?
Mij Aanta lissie-barkoe?
Mij Aantan nïekeds-barkoe?
Mejnie Aanta sæjhta barkedh gosse geerve sjædta?
Mennie universiteetesne maahta ööhpehtimmiem daan barkose vaeltedh?
Piere
Piere sæjhta båatsoe-burrine barkedh. Dïhte hov Pieren nïekeds-barkoe. Ij sïjhth maam jeatjah darjodh goh bovtsigujmie gïehtelidh.
Göökte jaepieh eatneme-åtnoe faagem jåarhke-skuvlesne lohkeme. Daan jaepien jïh båetijen jaepien jis båatsoe-burrie learohke.
Vaestedh!
Man gellie jaepieh vaesieh eannan Piere jåarhke-skuvlem galhka?
Silje
Silje nïekede tjiehpiedæjjine barkedh. Voestes jaepiem vætnoe-faagem jåarhkeskuvlesne lohki. Mubpie jaepien dellie gullie- jïh sïlpe-faagem lohki. Daan jaepien jïh båetije jaepien jis sïlpe-faagem låhka.
Vaestedh!
Mennie jåarhke-skuvline gåarede sïlpe-faagem lohkedh?
Næjla
Næjla sæjhta journalistine barkedh. Dïhte tuhtjie vihkele åadtjodh saemien aamhtesi bïjre lohkedh.
Vaestedh!
Goerehth jïh soptsesth magkerem ööhpehtimmiem Næjlese sjeahta!
Bïrje
Bïrje lyjhkoe lohkedh. Dïhte gaajhkh romaanh, novellh jïh jïjnjh ovmessie soptsesh åarjel-saemien gïelesne lohkeme. Tuhtjie ååpsen vaenie gærjah gååvnesieh. Ussjede tjaeliejinie sjïdtedh, jïh ajve saemien gïelesne tjaeledh. Men onterde guktie.
Vaestedh!
Maam vïenhth Birje tjuara darjodh/lohkedh jis sæjhta tjaeliejinie sjïdtedh?
Barkoe-sijjieh
Daesnie naan barkoe-sijjieh gusnie maahtah saemien gïelem nuhtjedh:
maana-gïertesne
maadth-skuvlesne
jåarhke-skuvlesne
Saemiedigkesne
NRK:sne
saemien reereme-tjïeltine
universiteetesne
Vaestedh!
Mij dov nïekeds-barkoe? Daajrah mejnie sïjhth barkedh gosse geerve sjïdth? Tjaelieh tekstem gusnie soptsesth maam tjoerh lohkedh jïh gusnie. Soptsesth aaj man gellie jaepieh tjoerh lohkedh eannan maahtah dam barkoem åadtjodh.