Gïele-joekehtsh

Saemien-gïele lea uraalen gïelijste jïh såevmien-ugrijken gïele-maadtoste, jïh daaroen-gïele jis indo-europeijen gïele. Juktie daaroen-gïeleste saemien-gïelese jarkelidh jïh aaj jarkoestidh, dellie gellielaaketje haestemh jijhtieh. Vihkeles dellie gïeli joekehtsh daejredh jïh vïhtesjidh.

Vihkeles vïhtesjidh guktie saemien baakoe-våarhkoe jïh gïele-åtnoe, magkerh saemien baakoeh gååvnesieh, jïh guktie baakojde veeljedh jïh nuhtjedh. Tjoerebe aaj vïhtesjidh guktie saemien grammatihke jïh guktie raajesh bigkedh. Ij dan hijven sjïdth jis ajve daaroen baakoste saemien baakose jarkoestibie. Dellie daaroen-gïele ååpsen jïjnjem saemien-gïelem baajnehte, dovne lööneme-baakoejgujmie jïh raajese-bigkeminie. Kultuvri gaskem aaj joekehts vuekieh guktie almetjh soptestellieh jïh sinsitnine gaskesedtieh jïh guktemslaakan dom jïh daam jiehtieh.