Ånnetji saejrieh jïh vertemen bïjre

Gaajhkh almetjh lin tjoereme bearkadidh dejnie mejnie lin gïeten sisnie åtneme, numhtie leah orreme gaajhkh beeli. Jïh numhtie lea aaj dïhte saemien jieleme jïh kultuvre sjïdteme guktie lea sjïdteme.

Manne sïjhtem daelie ånnetji tjaeledh maam leam govleme guktie saemieh dejpeli dåemiedin gosse lin irhkesjamme, tjoehpedamme. Manne åtnam eah sih daelie man gallesh mah man jïjnjem dan bïjre daejrieh, men såemies sih maam akth annje daejrieh. Men hijven hov maehtiejibie gærjine lohkedh mah lin tjaaleme dan bïjre, dah mah lin saemide gutneme jïh goerehtalleme guktie saemieh provhkin darjodh gosse lin skïemtjijamme, irhkesjamme, gosse vaejviem utnin jïh guktie saejriejgujmie dåemiedin. Ij leah gaajhke gaarvanamme.

Manne måjhtam maana-baeleste, goh mijjieh åerpienadtjh limh aahkan bealesne. Aahkan nomme lij Maria Marsfjell. Dïhte mijjide maanide jïjnjem bïhkedi guktie saemieh provhkin darjodh jïh guktie saemien vuekie lij. Daelie aavojne maahtam måjhtajidh, men daelie man leam jïjnjem åajaldahteme.

Manne måjhtijem gosse mijjieh limh tjoehpedamme dellie aahka provhki mijjide jiehtedh luvhtimh saejrese ånnetji lædtjkoedidh edtja raajnes sjïdtedh. Ikth goh lim soermem tjoehpedamme dellie aahka njohkh ohtsedi jïh saejrese badtjadi, tsoedtsem dueljeste gajhkoeji jïh dle dam gïebredi soermen bïjre jïh die mejnie aktine gårredi, men mij dïhte lij dam im mujhtieh. Ij sån lih dellie ovdaerpies njohkh jïh tsoedtsh provhkedh, men aahka sån tuhtji luste vuesiehtidh guktie aerebi provhkin darjodh.