Aktene faage-tjaalegisnie tjaelije tjuara bagkesidie buerkiestidh, jïh vuesiehtidh guktie satne lea ussjedamme. Sïejhme tjaelije tjuara aktem jallh jienebh gaaltijh nuhtjedh, jïh vihkeles gaaltijh reaktoelaakan utnedh jïh neebnedh. Tjuara iktegisth tjïelke årrodh, mah åssjaldahkh mah leah tjaelijen jïjtse åssjaldahkh jïh mah åssjaldahkh tjaelije lea veedtjeme mubpiej tjaalegijstie. Skuvle-laavenjassine muvhten aejkien bïevnesem åadtjoeh maam gaaltijidie jallh mah gaaltijh datne edtjh våaroeminie utnedh.
Gosse edtjh faage-tjaalegem skuvlesne tjaeledh dellie vihkele datne dov maahtoem teeman bïjre vuesehth. Dellie edtjh dov maahtoem nuhtjedh gosse tjaalegh digkedh, åahpedh jallh viertesth. Kaanne laavenjassesne tjaaleme tjoerh teemam, viehkie-vierhtieh viertiestidh ovmessie tjaaleginie guktie filmem jïh diktem, novellam jïh diktem, guvvie-raajroem jïh tjaalegem. Gosse datne edtjh tjaalegen bïjre ussjedidh dellie vihkele datne dov åssjaldahki bïjre tjaalah. Mujhtieh tjaalegem eensilaakan tseegkedh jïh tjïelke tjaeledh juktie aelhkie datnem guarkedh.
Vihkeles baakoeh
Viertiestidh: dellie edtjh joekehtsh jïh hedtieh vuesiehtidh vg. göökte tjaaleginie. Mujhtieh teemam, sisvegem, dïjrem jïh hammoem viertiestidh.
Tjïelkestidh: dellie edtjh dov maahtoem teeman bïjre eensilaakan buerkiestidh.
Toelhkestidh: dellie edtjh tjaeledh maam tjaalege mijjese jeahta. Tjoerh ovmessie biehkieh tjaalegistie analyseradidh jïh dan mænngan soptsesth mij tjaalegen teema, sisvege jïh dïjre.
Analyseradidh: dellie edtjh ovmessie biehkieh tjaalegistie lahtestidh jïh lahtesth aaj guktie tjaalege tseegkeme.
Mïelem utnedh: dellie edtjh dov mïelem jïh vuajnoem tjaeledh teeman bïjre.
Åehpiedehtedh: vg. edtjh tjaelijem jallh gærjam åehpiedehtedh.