Gïele lea tjoejh, baakoeh jïh raajesh mah ektesne veadtaldihkie juktie almetjh maehtieh soptsestalledh, guarkadidh jïh mïelem buektiehtidh. Gïele lea grammatihkeles njoelkedassi mietie bigkeme, mah jorkesieh tïjjen mietie. Gïelen gellie dïrregh, juktie mijjieh maehtebe jiehtedh maam sïjhtebe.

Daennie teemesne lïerh nomeni, verbi, seerkeme-baakoej, raajese-bigkemen jïh jarkoestimmien bïjre.

Baakoe nomene latijnen gïeleste båata mij lea nomme. Mijjieh baakoeh nomeninie gohtjebe, mah maehtebe kaasusinie jïh taaline sojjehtidh. Nomenh leah substantijvh, pronovmenh, taalh jïh adjektijvh. Åarjelsaemien-gïelesne maehtebe nomenidie gaektsine kaasusinie jïh gööktine taaline sojjehtidh.