Hopp til innhold
Fagartikkel

Vijreme jïh bivtemen bïjre

Vijredh, bivtedh jïh gööledh joekoen vihkeles noerhte skåake-dajvine Skandinaavesne orreme gossege dah voestes almetjh dajvese böötin medtie 10 000 jaepiej dan åvtelen. Dovne daanbien maehtebe gïejh dehtie tïjjeste vuejnedh.
Spaenjie-tjaalegh Altesne. Vuesehte almetjh vïnhtsesne jïh vijrh baalte. Guvvie.
Bilde: Andreas Haldorsen / CC BY-SA 4.0

Spaenjie-tjaalegh

Spaenjie-tjaalegh daamhtah sarvh vuesiehtieh, jalhts akten sijjesne Sveerjesne gellie guelieh tjaalehtjamme. Daanbien dejtie væhtine vuejnieh man vihkeles dïhte vijreme tjuetie jaepine orreme. Gierkienjoele-gietjieh dej spaenjie-tjaalegi lïhke mejtie Liksjosne gaavneme maehtieh sih gïejh årrodh gosse vijremem dovletje earoehtin.

Vijreme-svaalkh

Vijreme-svaalkh sarvide jïh gedtide joekoen sïejhme. Dah båarasommes mejtie gaavneme medtie 6000 jaepieh båeries, jïh daam vuekiem 1860-jaepine bïedtehtovvi. Dah kråavh mahte sinsitnien baalte båårestahkine dah dajvine gusnie vijrh aaj daelie minnieh. Baatsahtassh smaave vijremisnie, sueptjehkh riepide, gosse riepie sïeptegen mietie nuhtjie dellie åvtesjuelkine dïsse dabrani, jallh bartah åerievidie maam Vistiegisnie, Sveerjesne jaepien 2012 gaavnin. Daam bartam aareh 1900-jaepine Liksjoen tjïeltesne buerkiestamme: læjhkan ij naan jeatjah lehkesne gaavneme jalhts Vistiegisnie, Nöörjesne gedtie-vijremistie våarhkoeh gaavneme dagkere tjïekeme-sijjieh vijrijasse.