Soptsesh, vuelieh, dikth jïh jeatjah teeksth soptsestieh guktie almetjh jealeme, ussjedamme jïh domteme tïjji mietie. Gosse mijjieh teeksth lohkebe dellie maehtebe aelkedh ussjedidh, maam akt lïeredh jallh måarahtovvedh. Lissine teeksth maehtieh mijjem faepieldidh jallh madtjeldehtedh.

Gosse tjaelije tjiehpies-lidteræære teekstem tjaala, dellie maahta fantasijem nuhtjedh. Ij daarpesjh tjaeledh mij heannadamme, men maahta soptsesem hæhtadidh.

Åvtelen maehtebe teatere-vuasahtallemem jallh filmem darjodh, manusem daarpesjibie. Tjaelije manusisnie tjaala, mah dorjehtæjjah edtjieh jiehtedh jïh darjodh. Baakoe draama, mij lea dahkoe, grekiske gïeleste båata.