Åarjelsaemien voestesgïeline
Saemien voestesgïeline learohke edtja gïelemaahtoem evtiedidh sov maehtelesvoeti jïh nuepiej mietie dovne njaalmeldh jïh tjaaleldh gïelesne. Faage edtja lohkeme- jïh tjaelemelastoem skreejredh, jïh viehkiehtidh hijven lïerehtimmievuekieh evtiedidh.
Saemien voestesgïeline edtja learoehkh viehkiehtidh dej njaalmeldh jïh tjaaleldh gïelemaahtoem evtiedidh. Learohkh saemien lidteratuvrem åehpiedehtieh jïh lïerieh guktie tjiehpies gïeleutniejinie sjïdtedh.
Learohkh edtjieh gïelemaahtoem evtiedidh sijjien maehtelesvoeti jïh nuepiej mietie dovne njaalmeldh jïh tjaaleldh gïelesne. Faage edtja lohkeme- jïh tjaelemelastoem skreejredh, jïh viehkiehtidh hijven lïerehtimmievuekieh evtiedidh. Dikth, vuelieh, soptsesh, artihkelh, håalemh- gïeline.
Faagesne saemiengïele voestes gïeline Jåa1BF/SR datne gaavnh faageartihkelh, laavenjassh jïh filmh mah maahtoeulmide veadtaldihkie.
Mijjieh daam learoevierhtiem learoesoejkesjen mietie evtiedamme. Faagevierhtine learohkh maehtieh goerehtidh jïh kreatijvelaakan barkedh. Lissine edtjieh ussjedadtedh, soptsestalledh, digkiedidh, ektiedimmiem vuejnedh jïh laejhtehks årrodh. Saemien aaj faage mij ektiedamme saemien kultuvrese jïh identiteetese.
Daelie mijjieh aalkeme faagem orrestehtedh. Jïh mijjieh faagem jarngebiehkiej mietie öörneme. Båeries faagesæjroeh jïh laavenjassh libie orrestahteme. Lissine aalkeme orre faagesæjroeh jïh laavenjassh darjodh.
Mijjieh aalkeme tjaeleme-kuvsjem ovmessie sjangerinie darjodh. Dellie learohkh viehkiem åadtjoeh gosse edtjieh jïjtje tjaeledh. Abpe jåarhkeskuvlen teema grammatihken bïjre joe gaervies, juktie learohkh maehtieh dejnie barkedh.
Learoesoejkesjen mietie faage edtja sjïehtelåbpoe sisvegem, tjïelkebe progresjovnem åadtjodh, jïh ektiedimmie faagi gaskem edtja buerebe sjïdtedh. Laejhtehks ussjedimmie jïh ussjedadteme edtjieh akte vihkeles bielie årrodh destie maam learohkh edtjieh skuvlesne lïeredh. Sjugniedihksvoete jïh lïeremestrategijh leah aaj vihkeles.
Learoesoejkesjen golme dåaresth-faageles teemah mijjieh meatan vaalteme faagevierhtine:
Demokratije jïh meatanårrojevoete
Monnehke evtiedimmie
Almetjehealsoe jïh jieledehaalveme
Mijjieh veeljeme faagem naemhtie juekedh
Saemiestidh
Gïele goh nuepie
Teekstine barkedh
Tjaeledh
Gïelegellievoete Saepmesne
Gïele goh systeeme
Gaaltijh jïh gaaltije-laejhteme
Kråangken jåarhkeskuvle jïh Aajege/ Rørosen jåarhkeskuvle daejnie learoevierhtine laavenjostoeh. Trööndelagen fylhkentjïelte prosjektem eekie. Prosjekte beetnehvierhtieh Saemiedigkeste, Trööndelagen fylhkentjïelteste jïh NDLA:ste (Nasjonal Digital Læringsarena) åådtje.