Njuike sisdollui
Fágaartihkal

Lååjkerdæjjese ringkedh

Aanta sjïehteles gåetieluhpie-bïevnesem gaavneme jïh daelie lååjkerdæjjese ringkie.
Göökte baernieh. Akte baernie såffesne tjahkesjeminie. Mubpie baernie guelpesne tellefovnine tjahkesjeminie. Guvvie.
Govva: Science Photo Library, NTB / CC BY-NC 4.0

Daelie lïerh

  • gåetie-luhpien mietie ringkedh

  • gihtjedh jïh vaestiedidh

Goltelh jïh lohkh!

Goltelh guktie gåarede gosse Aanta lååjkerdæjjese ringkie jïh gåetie-luhpien mietie gihtjie.

Aanta lååjkerdæjjese ringkie

Lååjkerdæjja: Hallo, Ralphe daate.

Aanta: Buerie bijjie, mov nomme Aanta. Datne dïhte gie gåetie-luhpiem åtna?

Lååjkerdæjja: Nov leam, manne dïhte.

Aanta: Datne annje daam gåetie-luhpiem åtnah?

Lååjkerdæjja: Nov badth, åtnam. Datne sïjhth leejjestidh?

Aanta: Jaavoe, gåetie-luhpiem daarpesjem gosse jïlle-skuvlesne daan tjaktjen aalkam. Guktie dïhte gåetie-luhpie? Man stoerre lea?

Lååjkerdæjja: Dïhte 20 kvm, daesnie seangkoe, buertie, stovle, dovne tjöövke-roene gusnie maahtah beapmoeh jurjiehtidh.

Aanta: Man jïjnjem maeksedh gåetie-luhpien åvteste?

Lååjkerdæjja: Dan åvteste 6 500 kråvnah fïerhten asken, jïh lissine 900 kråvnah straejmien jïh gaske-viermien åvteste. Gåetie-luhpie skuvlen lïhke, ajve akte kilomeetere skuvlese vaedtsedh.

Aanta: Åå, jöödtedh bielien, munnjien dan dovrehke sjædta. Bïevnesen mietie 6.500 kråvnah, ij maam gænnah straejmien jïh gaske-viermien bïjre desnie. Im daejrieh mejtie maahtam dan jïjnjem goh 7 400 kråvnah maeksedh fïerhten asken.

Lååjkerdæjja: Ov-gaath dutnjien, men soptsesth dle ånnetji dov bïjre.

Aanta: Mov nomme Aanta. Manne 18 jaepien båeries. Edtjem voestes jaepien jïlle-skuvlesne aelkedh daan tjaktjen. Skuvle aalka mïetsken 21. biejjien.

Lååjkerdæjja: Saarnoeh dle, maam edtjh skuvlesne lohkedh jïh maam eejehtimmien darjoeh?

Aanta: Gaarsjelimmie-faagem edtjem lohkedh jïh eejehtimmien manne lyjhkem juelkie-tjengkerem spealadidh jïh dovne sygkeldidh. Manne skåårnehke jïh im gænnah jïjje-snjagline.

Lååjkerdæjja: Dellie hijven, mov baernie seamma faagem aerebi lohkeme jïh dïhte aaj juekietjengkere-spealije. Jis datne 7 000 kråvnah maaksah dellie gåetie-luhpie dov.

Aanta: Man hijven, men voestegh tjoerem ussjedidh! Maahtam jirreden vihth dutnjien ringkedh?

Baakoeh
gaske-viermie
internett
jïjje-snjagla
nattugle
lååjkerdæjja
utleier
saarnoeh dle
fortell så
skåårnehke
ordentlig
straejmie
strøm
Åå, jöödtedh bielien!
Å, jøje meg!
Gyhtjelassh

  1. Gïese Aanta ringkie?

  2. Guktie lååjkerdæjjan nomme?

  3. Man mietie Aanta gihtjie?

  4. Man stoerre gåetie-luhpie?

  5. Mah deerpegh gåetie-luhpesne?

  6. Man dovrehke gåetie-luhpie?

  7. Gåessie jïlle-skuvle aalka?

  8. Man mietie lååjkerdæjja gihtjie?

  9. Maam Aanta skuvlesne edtja lohkedh?

  10. Maam Aanta eejehtimmien dorje?

  11. Maam vielie Aanta soptseste jïjtse bïjre?

Mij reaktoe?

Soptsesth!

  1. Guktie almetje gosse skåårnehke? Buerkesth!

  2. Guktie almetje gosse jïjje-snjagline? Buerkesth!

Tjaelieh!

Datne edtjh lååjkerdæjjese ringkedh gåetie-luhpien mietie gihtjedh. Soptsesth dov bïjre!