Anders Fjellneren bïjre
Anders Fjellner, skïereden 18. b. 1795 reakasovvi Ruvhtesne, Härjedaelesne jïh goevten 22. b. 1876 sealadi Suarsesne.
Fjellner lij saemien hearra jïh tjaelije. Jaepien 1821 hearrine sjïdti jïh eelki hearrine Gárasavvonisnie jïh Čohkkirasesne barkedh jaepien 1821. Jaepien 1841 Fjellner båatsoe-raajrojne Suarsese juhtieji jïh desnie årroeji jïh hearrine barki medtie 35 jaepieh. Fjellner åarjel-saemien soptsesti jïh aaj noerhte-saemien jïh soemen gïelem lïeri. Christina Päiviöine, Gárasavvonistie pruvri.
Anders Fjellner soptsesh, joejkeme-teeksth jïh vaajesh tjöönghki. Saemieh dovne noerhtene jïh åarjene mytologijen soptsesh Fjellnerasse soptsestin. Dïhte dovne åarjel-saemien jïh noerhte-saemien tjeeli.
Soemen gïele-dotkije Otto Donner Fjellneren gåajkoe vöölki jïh golteli maam Fjellner soptsesti. Jaepien 1876 Donner tjihtesem «Biejjien baernien såangoe Jeahnaj eatnamisnie» bæjhkoehti. Mijjieh maehtebe daam sjugniedimmie-eposine gåhtjodh. Gaatesjen ij originaale-tjaalege daelie gååvnesh jïh boelhkh daestie fååtesieh.
Daate epose soptseste gubpede dah voestes saemieh båetieh. Saemieh leah biejjie-baernien jïh jeahna-nïejten maanah. Fjellnere soptsesti, daam eposem govli dovne Torne-dajvesne jïh åarjel-saemien dajvesne.
«Biejjie-baernien såangoe Jeahnaj eatnamisnie» aalka guktie lij dej beeli, jïh dan mænngan guktie Biejjie-baernie byjjeni. Mijjieh åadtjobe sov såangoe-fealadimmien bïjre govledh Jeahnan nïejtese jïh guktie dah guaktah bååstide Saapman vöölkigan. Jeahna-nïejten vïellh dejtie dåålvedin jïh mahte jaksin. Jeahna-nïejte jïh Biejjie-baernie gellie maanah åadtjoejigan, mah leah saemiej maadtoe.