Nils Mattias Andersson
Nils Mattias Andersson lij båatsoe-saemie Ryfjell Umbyn sïjtesne. Jaepien 1919 Anna Sofia Zakrisdotterinie pruvri. Dah guaktah govhte maanah åadtjoejigan. Nils Mattias Åvlavuelien råantjoeh tjoeje-baantese joejki jaepien 1952. Jeehti sïjhti daennie vueline sov testamentem vedtedh.
Åvlavuelien råantjoeh
Nils Mattias sov jieleden jïh fuelhkien bïjre juajka, ealoen jïh vaerien bïjre.
Vuelien sisvege
Ålma sov ealoem bijjene vaeresne ryöjnesje jïh vuajna guktie gåmmebe Aanna, gåetesne tjahkesje speatnoen nuelesne, dållem nastehte jïh bosse. Jaevresne Aanna vïnhtsesne göölie jïh maanah bïllijieh stoerre gueleste mij dabrene. Ålma Åvlavuelesne ryöjnesjeminie jïh bovtside gellie ovmessie baakoejgujmie lahteste. Åvlavuelien speatnoe jallh sïelke lea veerehke jïh bovtsh gaatoelieh.
Dïjre
Nils Mattias dïjrem sov gïeline buakta. Baakoeh nuhtjie mah maehtebe ovmessie vuekine toelhkestidh. Vuesiehtimmien gaavhtan veerbem njammedh nuhtjie daennie raajesisnie «Men, Åvlavuelien stoerre sielke, sielke - stoerre sielke - njammeme mov stoerre kranna raanhke - raanhke, raanhke, raanhke». Naemhtie Nils Mattias buerkeste guktie ealoe gaatoelamme.
Guktie jåhta
Gosse joejkeminie dellie gievline juajka. Nils Mattias såemies baakojde gellien aejkien juajka. Mejtie sån tuhtjie dah baakoeh vihkeles jallh baakoeh ikth vielie juajka mearan ussjedeminie maam edtja vielie joejkedh.
Nils Mattias sov jieleden bïjre juajka guktie åvtesne jïh guktie daelie. Aalkoevisnie juajka guktie måjhta gåmmebe Aanna tjahkesje dållem nastehte jïh minngiegeatjan dellie måjhtije guktie såtnoeh voerestovveme.