Filme-darjoje Elle-Máijá Tailfeather

Eelki filmine barkedh jaepien 2011 gosse åenehks-filmem Bloodland darjoeji. Filmem darjoeji juktie sïjhti åålja-sïelti vööste gïrredh mah edtjin aelkedh ååljan mietie naepierdidh blackfoot-almetji dajvesne. Daan filmen mænngan Elle-Máijá gellie jeatjah filmh dorjeme ovmessie sjangerinie goh fiksjovne, dokumentaare, mokumentaare jïh musihke-videjo.

Saemie jïh blackfoot

Elle-Máiján aehtjebe lea saemie Nöörjeste, mearan tjidtjebe blackfoot-almetje tjierteste Kainai First Nation. Kanai-tjïerte aaj åehpies goh «the Blood Tribe» jallh «Kainaiwa». Daate tjïerte aktede dehtie stuerebe Blackfoot-dåehkeste gusnie golme tjïerth: siksikáwa, kainai og pieganere. Blackfoot-almetjh Albertesne, Canadesne, årroeminie, gusnie dejpeli bööffelh vijrin. Aaj åehpies dej aejlies aerpievuekien biejjie-daanhtsomen gaavhtan.

Aalkoealmetje-teema

Elle-Máiján filmh leah daamhtaj aalkoe-almetji dåeriesmoeri jïh ovreaktaj bïjre seabradahkesne. Filmh leah festivaline vuesiehtamme gelline sijjine veartenisnie, guktie filme-festivalesne Berlinesne, festivalesne Vancouver International Film Festival, festivalesne imagineNATIVE Film and Media Arts Festival, festivalesne Seattle International Film Festival, jïh festivalesne Tromsø internasjonale filmfestival (TIFF).

Laavenjasse

Gaavnh filmem Decolonization gaskeviermesne jïh vuartesjh dam.