Láhppon plásta
Lottit, guolit ja eará eallit mat ellet mearas ja mearragáttis, sáhttet darvánit bázahusaide nu mo báttiide, oaraide ja plástabussiide. Muhtimat doivot plástta biebmun, ja borret dan. Dat sáhttá gallánan dovddu addit, ja dagahit ahte ealli ii bora doarvái albma biepmu.
Plástafális Sotras
Jagis 2017 bođii fális gáddái Sotras Bergena olggobealde. Fális lei nu buohcci ahte mearridedje heakkahuhttit dan. Fállá čoavjjis gávdne 30 plástabusse. Dát dáhpáhus bovttii riikkaidgaskasaš beroštumi, ja adno jorggáldahkan plástanuoskkideami rahčamušas.
Mikroplásta - sáhttet go smávva binnážat addit stuora váttisvuođaid?
Planktonat sáhttet mikroplástta doaivut biebmun. Nie boahtá mikroplásta biebmogollosii. Guolit borret planktona, ja mii ges borrat guoli.
Dasa lassin ahte plásta sáhttá sisttisdoallat birasmirkkuid buvttadeami rájes, de sáhttet maid eará birasmirkkot darvánit mikroplástii luonddus.
Geahččaladdamat čájehit ahte guliid makrofágat (borranseallat) sisaváldet smávva plástakuvllaid, ja geahččalit daid mollet. Lea vuos eahpečielggas mat váikkuhusat dás leat guoli dearvvašvuhtii, ja mat váikkuhusat mikroplásttas leat eará organismmaide mat ožžot dan iežaset sisa.
Bargobihttá
Maid doaivvut leat stuorámus gáldun mikroplástii Norggas? (Gávdnojit eambbo mikroplástagáldut go dat mat leat dán bargobihtás).
Maid sáhtát dahkat?
Čoavdin dihte váttisvuođa láhppon plásttain, de mis ferte rájiid rasttildeaddji ovttasbargu. Bojan Slat lea nuorra nederlándalaš gii lea ovdánahttán metoda mo čohkket stuora plásttahivvodagaid mearas.
Ocean Cleanup prošeavttas galget stuora feastonuohtit, darvvihuvvon áŋkoriin mearrabodnái, darvehit plástta mii čoahkkana guovlluide gos máŋga áhperávnnji deaivvadit, nu gohčoduvvon "Garbage Patches".
Doaibmabijut maiguin unnida plástahivvodaga luonddus:
- unnidit biilavuodjima.
- čorget plástta doppe gos orut.
- geavat biktasiid nu guhká go vejolaš.
- basa biktasiid busses mii čohkke mikroplástta, dahje bija plástafilttara bassanmašidnii.
- atte plásttadoavnnji ávnnasmáhcaheapmái.
- váldde eret biktasiin gummegranuláhtaid mat bohtet goanstarássešiljus ovdal go basat daid.
- ale basa basadangáris gušta mainna leat málen.
- geavat kosmehtalaš buktagiid main ii leat mikroplásta (buktagiin main lea Njukčamearka áibbas sihkkarit ii leat mikroplásta).
Smiehta mat!
Manne daddjo "unnidit biilavuodjima" listtus mas leat doaibmabijut unnidit plásttahivvodaga luonddus?
Gáldut
NRK. (2018, 12. august). Verden trengte en hval full av plast for å våkne. Hentet fra https://www.nrk.no/norge/plasthvalen-okte-nordmenns-miljoengasjement-1.14162855
Miljødirektoratet. (2019, 27. mai). Mikroplast. Hentet fra https://miljostatus.miljodirektoratet.no/mikroplast
The Ocean Cleanup. (2020). Passive Clean Up System. Hentet fra https://theoceancleanup.com/oceans/
Veterinærinstituttet. (2019, 18. februar). Mikroplast fanges opp i fiskens gjeller og celler. Hentet fra https://www.vetinst.no/nyheter/mikroplast-fanges-opp-i-fiskens-gjeller-og-celler