Fágaartihkal
Infinihte verbi bïjre
Infinihte verbh leah verbh mah eah leah sojjehtamme. Daennie sæjrosne datne infinihte verbi bïjre lïerh, mah leah verbi infinihte hammoeh, jïh guktie dejtie nuhtjedh raajesinie.
Govva: Marit M. Fjellheim / CC BY-NC-ND 4.0
Verbh mah eah leah finihte verbh, leah infinihte.
Verbi infinihte hammoeh leah verbe-hammoeh gusnie verbh eah leah sojjehtamme. Daah hammoeh gååvnesieh:
- Infinitijve: båetedh
- Progressijve (gerundiume): båetieminie
- Perfektum partisihpe: båateme
- Nyöjhkeme-hammoe: båetieh
- Verbe-genitijve (vuekie-hammoe): vaedtsien
Vïhtesjh! Eah gaajhkh verbh verbe-genitijvine (vuekie-hammojne) sjïehth.
Vuesiehtimmie-raajesh:
Sïjhth båetedh?
Læjsa båetieminie.
Laara joe båateme.
Ij Saara båetieh.
Aanta båata vaedtsien.