- Maid dutnje mearkkaša doaba dutkanberošteaddji?
- Mii dihtorsimuleren lea?
- Mii lea erohus mihttologus ja mihttoovttadagas (ovttadat)? Mii das lea fysalaš sturrodagain dahkamuš?
- Man guovtti vuogi mielde sáhttit mihtidit mássa?
- Manne sáhttit luohttit mihttorusttegiidda mat geavahuvvojit oastima ja vuovdima várás?
- Mii lea erohus mihtidaneahpesihkarvuođas ja boasttumihtideamis?
- Mii lea absoluhtta ja relatiiva mihtidaneahpesihkarvuođas erohus?
- Namut moadde ovdamearkka mo sáhttit unnidit mihtidaneahpesihkarvuođa.
- Galle siffara galgat geavahit go ovdanbuktit árvvu mihtiduvvon sturrodagas?
- Maid oaivvildat observašuvnnadáhtain? Namut ovdamearkkaid.
Čoavddaevttohusat
- Dutkanberošteaddji lea unnibuš dutki guhte lea oahpahallame dieđalaš metodaid geavahit.
- Dihtorsimuleren lea meroštallan mii dahkko dihtorprográmma vehkiin.
- Mihttolohku muitala man ollu ovttadagat muhtin sturrodagas leat. Mihttoovttadat lea bissovaš árvu dahje mearriduvvon sturrodat mii adno mihtideami várás. Sturrodaga ferte álo ovdanbuktit mihttologuin ja ovttadagain.
- Mii sáhttit mihtidit mássá jus veardidat dan amas mássá oahpes mássáin, viehkaga vihkkema bokte. Mii sáhttit mihtidit deattu dávgeviehkagiin, ja rehkenastit dan mássán, muhto de fertet dovdat lossodaga akselerašuvnna báikkis.
- Dannego rusttegat dárkkistvvot Justervesena bargiin jeavddalaččat.
- Mihtidaneahpesihkarvuohta lea iešvuohta mihtidanmetodas mii muitala man dárkilit sáhttá mihtidit. Boasttumihtideapmi čuožžila go rusttegat eai leat ortnegis dahje jus mihtideapmi dahkko boastut.
- Absoluhtta eahpesihkarvuohta lea bealli variašuvdnagovdodagas. Relatiiva eahpesihkarvuohta lea absoluhtta eahpesihkarvuohta proseanttas gaskamearálašmihtideamis.
- Mii sáhttit geavahit buoret mihtidanrusttega dahje dárkilit mihtidan metoda. Mii sáhttit maid mihtidit nu stuora sturrodagaid go vejolaš.
- Mii geavahit nu máŋga siffara ahte maŋemus siffar ovddida eahpesihkarvuođa. Jus mii meroštallat fiellu leat 1128 ± 2 mm guhku, sáhttá rievtti mielde leat juogo 1126, 1127, 1128, 1129 dahje 1130 mm.
- Observašuvdnadáhta lea dat diehtu maid mii oažžut go guorahallat muhtin fenomena dahje čađahit geahččaladdama. Observašuvdnadáhta sáhttet leat sihke govat, mihtideamit ja čilgehusat.
CC BY-SADán lea/leat čállán Nils H. Fløttre.
Maŋemusat ođastuvvon 01/18/2018