Interaktiiva bárrobargobihttá
Lea maid vejolaš demonstreret bárrolihkkastagaid guhkes bátti dahje guhkes stálledávggi vehkiin. Guokte oahppi doallaba goabbat geaži báttis dahje dávggis:
Energiija ja frekveansa: Nubbi oahppi ráhkada báru dan bokte go lokte ja vuolida bátti jođanit. Rievddadala man jođanit loktet ja vuolidat bátti oažžun dihte vásáhusaid lassanan frekveanssain.
Interfereansa: Demonstreren dihte bajálasttima sáhttiba guokte oahppi ráhkadit báruid goabbat geažis ja fuomášit mo bárut deaivvadit ja interfererejit.
Reflekšuvdna: Darvet bátti dahje dávggi geaži juoga masa mii ii lihkat, ja áicca mo bárut máhcahuvvet (reflekterejuvvet).
Vai čielgasit oaidnit mii dáhpáhuvva, de mii merket «Ravkkas» sádden dihte ovttaskas ravkasiid streaŋgga mielde, ja «Geahči luovos» vai oažžut bárrogierragiid goappašat guvlui.
Vállje «Ii obage» váidun ja «Vuollegis» gealdda. Amplituda ja ravkkasguhkkodaga válljet ieš.
- Deaddil ruoná boalu mii sádde ravkasa streaŋgga mielde ja geahča mii dáhpáhuvva.
- Sádde vel ovtta ravkasa nu ahte lea stuora gaska dan vuosttaš ravkasii. Iska mii dáhpáhuvva go ravkasat deaivvadit. Vállje áinnas «Hilljánis lihkastat».
- Mii dáhpáhuvva go deaivvadit guokte ravkasa main lea seamma stuora mohkki?
- Mii dáhpáhuvva go deaivvadit guokte ravkasa main lea seamma stuora mohkki goabbat guvlui?
Mii oaidnit ahte bárut eai rievdda maŋŋil go leat mannan nubbi nuppi meaddel. Lassin soaittát oaidnit ahte báru guoktá mohkit biddjojuvvojit oktii go leat seamma sajis. Dán gohčodit bajálastin.
Smiehta:
Lea go vejolaš partihkkaliid bajálastit? Mii de dáhpáhuvašii jus guokte bowlingspáppa beaškkiheaba oktii?