Barkh dïejvesigujmie

Laavenjassh

1. Almetjh maehtieh dïejvesidie joekehts-laakan guarkedh. Veeljh golme dïejvesh jïh buerkesth maam dah soptsestieh dov mïelen mietie. Tjaelieh muvhth raajesh daejtie dïejvesidie mejtie veeljeme.

   • Ij buerie njoktjide jïh voerhtjide seamma sæjjan learhkedh.

   • Dïhte eevre goh snjearan raajkan tjaangeme.

   • Geehtedh maam stoerre-njaelmie jeahta.

   • Bisseme-geatjan nollesovvedh.

   • Badtsh dah ledtide tjaebpies darjoeh.

   • Ij leah hijven gasngese-dållen baalte tjahkasjidh.

   • Båata goh haepkie.

   • Gaahtoe aaj guelieh sæjhta, jalhts ij sïjhth gadtside lovvehtidh.

   • Båatam gosse båatam.

   • Aellieh tjaajenh!

   • Eah læhkoeh eeremes oktegh båetieh.

2. Muvhth dïejvesh mahte seamma-laaketje goh daaroen dïejvesh mejtie govleme? Gaavnh dejtie jïh buerkesth.

3. Veeljh aktem daaroen dïejvesem maam datne govleme. Sjïehtedh dam dïejvesem saemien gïelese jïh kultuvrese.

4. Saemien dïejvesen mietie eah maanah edtjh geehpedh jallh plisterdidh gosse ålkone? Man åvteste, datne vïenhth?

5. Saemien dïejvesen mietie ij edtjh snöölhken bïjre gænnah nåake soptsestidh? Man åvteste, datne vïenhth?

6. Åarjelsaemien-gïelen gellie jorth-baakoeh daarojde jïh åejvieladtjide. Man åvteste nimhtie, dov mïelen mietie?

7. Dïejvesh maehtebe guektien-gïerts guarkedh. Kaanne daate dïejvese almetji bïjre aaj sjeahta? Buerkesth jïjtjedh baakoejgujmie.

   • Vuartesjh mannasinie båeries bïenje håhta.

8. Veeljh aktem jallh jienebh saemien dïejvesh. Buerkesth maam dïejvese/dïejvesh saemien kultuvren bïjre soptseste/soptsestieh, dov mïelen mietie.

9. Tjaelieh jïjtjedh dïejvesem.

10. Tjaelieh jïjtjedh jarpoem.