Korleis tilfredsstille deg sjølv og andre?

I den siste oppgåva skal elevane velje mellom ulike forteljingar om seksualitet. Klassen kan jobbe med case-oppgåvene individuelt eller i grupper. For somme elevar vil desse case-oppgåvene kunne verke støytande, og dei kan synast det er ubehageleg å jobbe med dei. Læraren bør derfor kjenne klassen godt og høyre med elevane i forkant om dei synest det er greitt å jobbe med slike konkrete forteljingar. Viss enkelte elevar ikkje ønskjer å delta, bør dei få moglegheit til å la vere eller gjere alternative oppgåver.

Siv og kjærasten

Siv og den nye kjærasten ligg med kleda på i senga. Dei har kyssa lenge og godt. Siv vil gjerne at dei prøver munnsex fordi det gir henne enklast orgasme, men først ønskjer ho at dei skal dusje for å få vaska bort ein heil dags sveitte og støv. Ho ser at kjærasten kler av seg og legg seg under dyna. Ho er redd kjærasten blir såra om ho foreslår ein dusj akkurat no. Ho vil ikkje øydeleggje den gode stemninga, men føler at utan dusjen vil ho verken gi eller få munnsex i dag.

Olav og kjærasten

Olav har fått besøk av av kjærasten. Dei er aleine i huset og sit i sofaen og kyssar lidenskapeleg saman. Olav byrjar å beføle kjærasten på brysta og merkar at brystknoppane er stive. Han spør henne om det er eit signal på at ho er kåt. Ho svarer "ja". Olav byrjar å fingre kjærasten sin på klitoris, mellom leppene, og merkar at ho er våt. Ho kviskrar "fortare", og han fingrar henne fortare. Etter ti minutt får ho orgasme. No tenkjer han at det er hans tur til å bli stimulert, men kjærasten reiser seg opp og ser på klokka. Ho har gløymd ein viktig avtale med mor si og seier at ho må springe. Olav blir skikkeleg lei seg og dreg henne ned i sofaen igjen.

Alex og Jonas

Alex og Jonas går begge på vidaregåande, men bur i ulike byar. Dei har deita online i tre månader. Alex har vore open om at han sit i rullestol. No skal dei møtast ansikt til ansikt for første gong. Alex har mykje god erfaring fordi han har hatt tre kjærastar tidlegare. Jonas er uerfaren og har aldri hatt kjærastar. Dei har bestemt at dei skal møtast heime hos Alex fordi han der har alt tilrettelagt – også seksualtekniske hjelpemiddel. Alex gler seg fordi han synest Jonas er veldig kjekk og klok. Dessutan har dei lik musikksmak. Det han no er litt usikker på, er om dei skal gjere litt meir enn å kysse på dette første møtet. Han vil ikkje skremme Jonas med erfaringa si.

Miriam og kjærasten

Miriam og kjærasten sit ved sida av kvarandre og høyrer på digg musikk. Miriam synest det er veldig lenge sidan dei har vore saman og endå lenger sidan dei har stimulert kvarandre seksuelt. Ho knepper opp buksa til kjærasten og startar med å runke han. Penis blir ikkje stiv. Miriam spør fornærma: "Er du ikkje glad i meg?" Kjærasten seier at ein ereksjon ikkje er synonymt med forelsking, at ein ereksjon ikkje er noko mål på kor glad han er i henne. "Grunnen til at eg ikkje får det til no, er at eg er sliten og trøytt", seier kjærasten. "Du får tru meg når eg seier at eg elskar deg og vil halde fram med å vere kjærasten din."

Kalil og Jon

Kalil og Jon sit saman i senga og har for første gong prøvd analsex med kvarandre. Dei brukte masse smørjing, så det blei veldig godt, og begge fekk orgasme. Begge er tilfredse, ser på kvarandre og kjenner tillit. Midt i samtalen og den fine stunda deira så ringjer telefonen og forstyrrar dei. Kalil har sagt mange gonger at begge må ha mobilen på lydlaus når dei koser seg eller gjer seksuelle aktivitetar. Kalil vil ikkje høyrast sur eller irritert ut, men Jon gløymer nesten alltid å stille mobilen på lydlaus.

Kim og Henny

Kim og Henny er på fest. Begge er keen på kvarandre og har funne eit ledig rom på festen. Henny er litt nervøs, men ho går på p-piller, så ho kjenner seg klar for alt. No står dei framfor kvarandre, og Henny byrjar å kneppe opp buksa til Kim, men Kim nøler. Han synest det går for fort. Henny les ikkje kroppsspråket hans, så Kim må seie "vent". Då blir Henny flau og trekkjer seg tilbake. Kim seier at det ikkje har nokon hast – at dei har god tid og kan kysse litt. Han seier at han er interessert i henne, men synest det blir så forhasta nå som dei er på festen med masse folk rundt.