Marknadsføring i det skjulte

Steve og Kate Jones verkar som eit perfekt ektepar. Dei er vakre og velkledde, har eit stort herskapshus og pengar til å kjøpe alt dei måtte drøyme om.

Ekteparet blir med det same lagde merke til av nysgjerrige naboar då dei flyttar inn i eit velståande villaområde. Dei to tenåringsbarna til paret, som representerer alt som er kult og trendy, blir òg raskt populære på den nye skulen.

Det tek ikkje lang tid før naboar, vener og nye kjenningar byrjar å kjøpe dei same tinga som trendsetjarfamilien.

Ganske tidleg i filmen kjem det fram at noko ikkje er heilt som det ser ut til med familien Jones. Dette er ikkje ein ekte familie, men ei marknadsføringseining beståande av fire profesjonelle påverkarar. Jobben deira er å selje produkt gjennom å verke rike, vakre og vellykka.

Filmen problematiserer ein type skjult marknadsføring der mottakaren ikkje forstår at det dreier seg om reklame, men trur at det dei ser, er livet og vanane til ekte menneske. Det kan trekkjast parallellar mellom tematikken i filmen og korleis såkalla "influensarar" reklamerer for ulike produkt på bloggar og sosiale medium, utan at det alltid er tydeleg for publikum at det dreier seg om reklame.

Du kan sjå filmen nedanfor.

Produktplassering er ei form for skjult reklame der eit selskap betaler for at produktet deira blir vist i eitt eller fleire medium.

James Bond-filmane var tidleg ute med produktplassering. Kjende merkevarer har heilt sidan den første Bond-filmen i 1962 dukka opp i handlinga – mot betaling.

Morgan Spurlock utforskar produktplassering

I 2011 laga Morgan Spurlock, som er avbilda nedanfor, ein dokumentarfilm ved namn The Greatest Movie Ever Sold. Filmen handlar om reklame og produktplassering i filmindustrien, og at filmregissør Morgan Spurlock på ein humoristisk måte prøver å skaffe sponsorar til filmen. Filmen er finansiert utelukkande med nettopp produktplassering og reklame.