Kva er AR, MR og VR?

Augmented Reality (utvida verkelegheit) er ein teknologi som forheld seg til det vi til vanleg ser rundt oss, men som legg grafiske framstillingar og illustrasjonar, tekst og objekt inn i synsfeltet vårt. Desse digitale tillegga kallar vi hologram. Formålet med hologramma er å gi oss ei forbetra eller meir informativ oppleving av den verkelege verda.

Mixed Reality (blanda verkelegheit) er ei videreutvikling av AR og gir brukaren ei blanding av den verkelege og den virtuelle verda. Mens AR legg virtuelle objekt oppå den verkelege verda, bruker MR sensorar og avanserte algoritmar for å plassere virtuelle objekt direkte inn i den verkelege verda. Brukaren kan då samhandle med både fysiske og digitale objekt på same tid og i dei same omgivnadene.

Virtuell Reality (virtuell verkelegheit) er ein teknologi som gir brukaren ei oppleving av ei komplett virtuell verd. Den verkelege verda blir blokkert ut ved hjelp av ein skjerm eller eit par VR-briller. Når vi bruker VR, forheld vi oss altså ikkje til den verkelege verda i det heile.