Religiøse kostomsyn
Mat er viktig i alle religionar, og kvar religion har reglar for kva som blir sett på som etande eller ikkje. Det er òg gjerne eigne ritual knytte til måltid og høgtider, og i nokre religionar blir det praktisert periodar med faste. For ein som er truande, er det viktig å følge dei retningslinjene som gjeld.
Når du jobbar med å lage mat til andre, må du ha kunnskap om ulike matvanar, skikkar og religiøse kostomsyn for å kunne legge til rette og lage god mat til alle. På den måten viser du òg respekt for at andre har vanar og tradisjonar som er ulike frå dine eigne.
Skikkane varierer innanfor same religion
På same måte som at matkulturen i eit land varierer mellom ulike landsdelar, vil òg religiøse matskikkar variere innanfor same religion. Menneske praktiserer religion ulikt og har ulike tolkingar. Nokon praktiserer religiøse matskikkar strengt, andre er ikkje så nøye på det. Det beste er å kommunisere med gjesten for å unngå misforståingar og høyre kva slags ønske og preferansar den enkelte har.
Når vi tilbyr ulike alternativ, som både ein fiskerett, ein kjøttrett og ein vegetarrett, vil dei fleste kunne velje ein av desse.
Tenk over
Kva matskikkar og reglar kjenner du til frå ulike religionar?
Kva religiøse mattradisjonar er du vakse opp med?