Det nye arbeidslivet – og nye vegar?

I "Midlertidig framtid" møter vi journalisten Ragnhild som er mellombels tilsett, og som òg har vore arbeidsledig ein periode. Mens ho leiter etter ny jobb, leiter ho òg etter svar på kva jobben betyr for oss menneske, og kva vi eigentleg kan vente oss i arbeidslivet i framtida. Sosialantropologen du møter i filmen, Ståle Wig, seier òg at koronakrisa har tvinga oss til å tenke nytt om kva verdifullt arbeid er. Han stiller spørsmål om kva samfunnet bør gjere på vegen vidare.

I denne oppgåva skal du gjere di eiga undersøking og din eigen analyse av tema dei tek opp. No skal du vere både journalist og sosiolog/sosialantropolog!

Dei to første oppgåvene er utgangspunktet for det du skal arbeide med i oppgåve 3 og 4.

Sjå episoden, og summer opp dei viktigaste poenga. Kva fann journalisten ut?

Sjå klippet med sosialantropolog Ståle Wig. Han seier at koronakrisa har vist oss at dei viktigaste yrka har låg respekt, låg lønn og låg status, og at i framtida må vi kanskje gå nye vegar.

Diskuter i par eller i grupper: Er det mogleg – og naudsynt – å endre på dette i samfunnet i dag?

Intervju seks ulike personar om temaet "Arbeid, menneske og samfunn".

Finn to informantar frå kvar av aldersgruppene 18–39, 40–59 og 60+.

Du kan lage dine eigne spørsmål eller ta utgangspunkt i forslaga under.

Jobb i gruppe på tre–fire, sortar funna dykkar, og lag ei samanfatning der de presenterer funna for læraren eller ei gruppe medelevar.

Skil mellom kva som er individforklaringar og strukturforklaringar i presentasjonen, og peik på eventuelle skilnader og likskapar i funn knytte til dei ulike aldersgruppene.