Skatt og finansiering
Som arbeidstakar betalar du skatt, og dette er med på å finansiere oppgåver og fellesgode, som til dømes undervisning og helsetenester.
No er dette rett nok berre ein del av det som er med på å finansiere fellesgode. I nyheitsbiletet har du kanskje ofte sett at både politikarar og andre samfunnsmedlemmer meiner vi må ha betre vegar, sjukehus og skular. Nokon av dei meiner vi bør bruke meir av oljepengane til å finansiere slike oppgåver, og kanskje heller redusere skattenivået for folk flest.
Andre har ein annan innfallsvinkel, og meiner at vi i Noreg kan jobbe mindre, og heller bruke meir av Oljefondet for fleire fellesgode for innbyggjarane.
Men er det eigentleg så enkelt? I denne oppgåva skal du reflektere over og drøfte nettopp dette temaet, og sjå nærmare på kva det kan bety for arbeid og arbeidstakarar i Noreg.
La oss først sjå på kva Oljefondet eigentleg er.
Norges Bank har ei nettstad om Oljefondet, og der finn du ein film der Oljefondet er kort forklart.
Oppgåve:
Jobb i grupper på 3–4 elevar.
Drøft:
Kvifor bruker vi ikkje meir av Oljefondet for å finansiere fellesgode og oppgåver i det norske samfunnet? Lag ei stikkordsliste med argument for og mot å bruke meir av Oljefondet.
Når de har drøfta og notert ned stikkord, kan de lese denne artikkelen frå SSB: Hvorfor kan vi ikke bare bruke oljepengene?
Artikkelen er ganske lang. Det kan derfor vere lurt å dele han opp mellom dykk, slik at de les kvar dykkar del. Noter ned nye stikkord som svarer på spørsmålet de drøfta i byrjinga av oppgåva. Deretter drøftar de spørsmålet på nytt, og lagar ei ny, felles stikkordsliste.
Kom det fram synspunkt i artikkelen de ikkje hadde tenkt på, eller hadde de kome fram til same synspunkt i forkant?
Kanskje fann de ut at det ikkje var så enkelt å "berre bruke oljepengane"?