Opplegget som er presentert under, er eit forslag på tre økter med parkour med ein tenkt progresjon. Det inkluderer òg videoar med øvingsutval der du kan velje ut frå ditt eige nivå. Det er lagt vekt på at opplegget skal bidra til utforsking, refleksjon og undring, åleine, i par og i grupper.
Gjennom dette opplegget vil du mellom anna erfare kva ulike grep med hendene, ulik fart, tilløp, retning inn mot hindera og plassering av beina i sats, svev og landing vil ha å seie for vanskegrad og resultat. Parkour er opphavleg ein utandørsaktivitet, men passar òg fint innandørs, og ein gymsal kan by på mange fine moglegheiter for kroppsleg læring. Refleksjonsspørsmåla du finn undervegs i opplegget, er retta mot kroppsleg læring.
Nedst i ressursen finn du eit vedlegg med QR-kodar. Desse QR-kodane kan du skrive ut og leggje på kvar stasjon. Når du skannar QR-koden, får du opp informasjon om stasjonen, aktuelle videoar og refleksjonsspørsmål.
Til læraren
Tips til førebuing
Gi elevane bakgrunnsinformasjon om parkour.
Ha ein samtale med elevane om læringsmål, kroppsleg læring og om korleis dei blir vurderte.
Ha ein samtale med vg2-elevane om koordinasjon, styrke, rørsleevne og psykisk og fysisk uthald. Bruk gjerne sidene under.
NDLA: Kva er koordinasjon?
NDLA: Kva er styrke?
NDLA: Kva er rørsleevne?
NDLA: Kva er uthald?
Tryggleik
Bruk god tid på oppvarming.
Sørg for at elevane meistrar øvinga på eit enkelt nivå før vanskegraden blir auka.
Fokus på ein god landingsteknikk med kne over tær og ved å fjøre av i knea i landinga.
Bruk matter og tjukkasar som sikring under og ved sida av alle hinder.
Sikre elevar som har behov for det, uavhengig av vanskegraden på øvinga. Sikre elevar som skal auke vanskegraden på ei øving eller eit hinder.
Bruk gjerne deløvingar i starten.
Læringsmål
Eleven skal utfordre seg sjølv motorisk og utfordre motet til å tøye eigne grenser.
Eleven skal bli kjend med korleis eigen kropp fungerer og bli klar over kva han eller ho kan få til og meistre.
Eleven skal samarbeide med andre og bidra til andre si læring.
Eleven skal forstå korleis ein kan utvikle koordinasjon, styrke, rørsleevne og uthald i aktiviteten parkour (vg2).
Vurdering gjennom heile perioden
Læraren vurderer
viljen og innsatsen eleven har til forbetring, òg når det ikkje blir nokon framgang
om eleven utfordrar seg sjølv og eigne moglegheiter
korleis eleven samarbeider med andre og bidreg til eiga og andre si læring og dessutan eleven si forståing for eiga læring
Oppvarming (20 minutt)
Rørsle over golvet: Sjå video under.
Hinderløype: Set ut utstyr i gymsalen. Dette kan vere plassert som i biletet under, slik at de kan gå rett over i neste aktivitet, eller på ein heilt annan måte. Suppler gjerne med matter og rockeringar slik at det går an å kome seg rundt i løypa i ulike retningar. Start med fri rørsle rundt i løypa.
Beveg dykk rundt i hinderløypa utan å tråkke på golvet.
Sisten i hinderløypa: To–tre elevar "har" sisten samtidig. Når nokon blir tekne, er det deira tur til å "ha" sisten.
Hovuddel (25 minutt)
Stasjonsøvingar: Fordel dykk på seks stasjonar. Berekn rundt fem minutt per stasjon. Nokre stasjonar krev meir rettleiing og sikring enn andre. Om førebuinga er god, er det mindre behov for rettleiing. Jobb saman i grupper. Gi kvarandre tips og tilbakemeldingar. Bruk gjerne filmane under som inspirasjon til stasjonsøvingane.
Stasjon 1: Springe på vegg
Her skal du prøve å springe på veggen, eller gjere ein "tic tac" som det heiter på parkour-språket. Sjå på videoen over og prøv trinn for trinn. Bruk gjerne ein kasse eller ei skumpute i starten.
Korleis kan du utfordre deg sjølv på denne stasjonen?
Kva må du gjere med kroppen for å få til å "springe" på veggen?
Stasjon 2: Springbrett og skumkasse
Her skal du ved hjelp av springbrett hoppe over skumkassane på ulike måtar.
Kor mange ulike måtar klarer du å kome deg over skumkassane på? Bruk gjerne video som inspirasjon.
Har du ein favorittmåte å hoppe på? Forklar dette hoppet, kva gjer du med armar og bein?
Stasjon 3: Bom
Her skal du trene på å kome deg gjennom, over eller under bommen, eller ein kombinasjon av desse.
Legg merke til kvar du plasserer hendene og føtene. Tilpass farten og utstyret etter eige nivå.
Gå saman to og to i gruppa, prøv å beskrive kva de får til på denne stasjonen, og kvifor de får det til.
Stasjon 4: Hopp og landing
Her skal du trene på å hoppe og lande på ulike måtar.
Kan du kome deg opp i ribbeveggen via benken?
Tør du hoppe ned på tjukkasen?
Tør du hoppe ned frå toppen av ribbeveggen?
Korleis jobbar du med beina i landinga?
Diskuter med partnaren din og finn ut korleis muskulaturen i beina jobbar i landinga, og kvifor det er viktig å fjøre i knea.
Stasjon 5: Presisjon og balanse
Her skal du balansere på benkane og hoppe frå benk til benk og voltpute.
Klarer de å starte frå kvar dykkar side av benken for så å passere kvarandre oppå benken? Diskuter i gruppa kva som fungerer best, og kvifor det fungerer.
Utfordre deg sjølv og medelevane dine til å balansere og hoppe på ulike måtar og med ulike kombinasjonar.
Start med korte mellomrom. Auk avstanden mellom hindera etter kvart som du meistrar øvingane.
Kva for nokre enkle tiltak kan du gjere for at det skal vere enklare for deg å balansere på denne stasjonen?
Stasjon 6: Kassar og bukk
Beveg deg frå ein kasse til ein annan, start gjerne på springbrettet.
Kor mange ulike måtar kan du kome deg over kassane på?
Kassane kan byggjast opp, og avstanden kan regulerast. Start med låge kassar, auk høgda og avstanden etter kvart.
Kva for nokre enkle tiltak kan du gjere for at det skal vere enklare for deg å balansere på denne stasjonen?
Avslutning (5 minutt)
Reflekter i par:
Kva synest du at du fekk til i dag? Kvifor fekk du det til?
Var nokon hinder eller stasjonar vanskelege? Kvifor var dei vanskelege?
Korleis vil du jobbe med dette neste økt? Kvifor vil du jobbe med dette?
I tillegg for vg2:
Korleis har du jobba med koordinasjon, styrke, rørsleevne og uthald i dag? Prøv å finne konkrete døme frå stasjonar og rørsler.