Finn dataa sjølv
I vanlege oppgåver er data du skal bruke, vanlegvis gitt i oppgåveteksten. Her er det meininga at du sjølv skal finne fram til data du kan analysere.
Aktuelle tema
Du kan til dømes jobbe med tema som
endring i konsumprisindeksen
befolkningsutviklinga i Noreg
bruttonasjonalprodukt
energibruken i Noreg
mediebruk i Noreg
elbilbruk i Noreg
statistikk om utdanninga i Noreg
Kvar finn eg data?
Du finn data om det meste på nettsidene til Statistisk sentralbyrå (ssb.no) (SSB). Andre sider du kan finne tal og statistikk på, er
- Kartverket: API og data
- Norsk senter for forskingsdata (NSD): Finn data
- Statistisk sentralbyrå: SSB Skole
- Statistisk sentralbyrå: Kommunefakta
Eit alternativ kan vere å samle data sjølv. Kanskje du kan spørje rektor på skulen din om du kan få tal på årsbudsjettet for skulen gjennom mange år?
Kva gjer eg med dataa?
I hovudemnet "Funksjonsanalyse og modellering" viser vi korleis du kan modellere data ved hjelp av funksjonar som så kan analyserast mellom anna ved hjelp av den deriverte. Vi har stort sett brukt GeoGebra til denne analysen. Tips: Når du skal importere tal inn i GeoGebra og har tala i eit vanleg rekneark, kan du kopiere tala og lime dei rett inn i reknearkdelen i GeoGebra.
Ein annan måte å analysere data på er å gjere statistisk analyse. På sida Behandling av store datamengder i Python (ndla.no) er det beskrive korleis du vel ut tal frå statistikkbanken med mediebruk i Noreg som døme, og korleis du kan bruke Python til å analysere dataa.
Resultata av analysane dine vil typisk vere grafiske framstillingar og konklusjonar du har trekt på grunnlag av analysane dine. På sida Metodar i utforsking (ndla.no) i NDLA si verktøykasse kan du lese meir om korleis du kan gjere eigne undersøkingar og behandle og presentere statistikk. Læraren din vil kanskje òg leggje nokre føringar for korleis du skal presentere resultata.
Kjelde
Utdanningsdirektoratet (2021). Kompetansemål og vurdering. Kompetansemål etter matematikk S1. Læreplan i matematikk for samfunnsfag (matematikk S) (MAT04-02). https://www.udir.no/lk20/mat04-02/kompetansemaal-og-vurdering/kv295