Stop motion med membrantransport
Arbeid saman i par, og lag eit tankekart eller små skisser som summerer opp alt de har lært om cellemembranen og membrantransport. Tenk på:
oppbygning
funksjon
transport
Forklar forskjellen på passiv og aktiv membrantransport.
Vi skil gjerne mellom tre ulike mekanismar for membrantransport:
transport direkte gjennom cellemembranen
transport ved hjelp av protein
vesikkeltransport
Forklar forskjellen på dei tre transportmekanismane, og gi døme på molekyl eller ion som blir transporterte på denne måten.
Lag ein modell av cellemembranen som kan brukast til å illustrere ulike typar membrantransport.
Hugs at ein modell er ei forenkling av verkelegheita. Dette gjer at alle modellar vil ha nokre styrkar og svakheiter. De må derfor velje kva det er viktig å gjere tydeleg i modellen dykkar.
Modelltips
Start med å lage fosfolipid-molekyl for å byggje opp ein modell av cellemembranen.
Set inn ulike transportprotein for passiv og aktiv transport.
- Finn små gjenstandar som kan illustrere ulike molekyl og ion.
- Sidan modellen etterpå skal brukast til å lage ein animasjon, er det ein fordel om dei ulike komponentane i modellen er flyttbare.
- Illustrer ulike typar membrantransport.
- Ta bilete undervegs.
Bruk modellen de har laga, til å setje saman ein animasjonsfilm som viser transport av ulike molekyl og ion over cellemembranen.
Start med å velje éin mekanisme for membrantransport.
Ta bilete
Når du skal lage ein stop motion-animasjon, set du saman mange stillbilete av noko som beveger seg litt for kvart bilete. Når du speler av bileta raskt etter kvarandre, ser det ut som om motivet beveger seg.
Fordel arbeidet slik at den eine tek bilete, og den andre flyttar på dei ulike elementa i modellen.
Opptakstips
Bruk stativ til mobil eller kamera. Stativa med muffer og klemmer på naturfagsrommet eignar seg veldig godt.
Finn ein stad med godt lys.
Bruk manuelt fokus på kameraet. Zoom inn, og still fokuset.
Hald fingeren på utløysarknappen, og dytt varsamt med fingeren utan å ta han av knappen. Slik kan du unngå bevegelsar i kameraet. Mange kamera har òg stemmestyrt utløysar.
Bruk ein ryddig og nøytral bakgrunn.
Skal du skrive eller teikne på ark, er det lurt å teipe det fast.
Ta mange bilete, gjerne hundre. Kvart bilete står berre i to ruter.
Set saman animasjonen
Når de er ferdige med å ta bilete, legg de dei i ei mappe på eininga dykkar og opnar programmet de skal bruke for å lage stop motion-filmen.
Arranger ei felles videovising i klassen der alle viser fram animasjonane dei har laga. Bruk gjerne eit evalueringsskjema der elevane kan evaluere kvarandre.
Forklarer modellane det som var føremålet med oppgåva?
Kva er bra med dei ulike modellane?
Kva forbetringar kan gjerast?
Relatert innhald
Kart og simuleringar er eksempel på modellar som er forenklingar av verkelegheita. Modellane har avgrensa bruksområde og fortel berre delar av sanninga.
For å kunne halde oppe eit stabilt indre miljø må cellene kontrollere og regulere all transport inn og ut. Her er cellemembranen heilt sentral.