I videoklippet ovanfor gir fotograf Tom Knudsen deg tre enkle tips til korleis bileta dine kan bli betre. Dei fleste av oss er nokså ubevisste når vi knipsar i veg. Ein god fotograf tenkjer gjennom kva for historie det er han eller ho ønskjer å formidle i biletet sitt.
Det første du gjer, er å velje motiv, korleis du vil plassere motivet i biletet, vinklane du vil sjå motivet frå, og kva som skal vere med innanfor biletramma. Dette kallar vi å komponere eit bilete. Deretter vel du kamerainnstillingar som får fram nett det uttrykket du ønskjer.
Her følgjer ti gode råd for fotografering:
Gå nærmare
Å komme tett innpå motivet gjer mykje med eit bilde. Unngå at hovudmotivet druknar i unødvendige detaljar.
Når du kjem tett innpå, kjem det tydeleg fram kva du tek bilete av. Motivet ditt blir ryddigare, då bakgrunnen blir meir uskarp.
Ver obs på bakgrunnen
Prøv å få biletet ditt så "ryddig" som mogleg. For at motivet skal komme godt fram, er det viktig å ikkje ha for mange element i biletet. Det kan vere nødvendig å flytte litt på seg for å få til dette.
Utforsk ulike posisjonar, biletutsnitt og kameravinklar, og prøv noko uvanleg! Det er også viktig å passe på at bakgrunnen blir så roleg som mogleg, og at ting i bakgrunnen ikkje forstyrrar eller kjem i konflikt med motivet ditt.
Bruk blitsen
Du treng ikkje spare blitsen til det blir mørkt. Blitslyset gir mange gode effektar også i dagslys. Blitslyset lyser opp motivet ditt og gir fargane meir liv. I tillegg hjelper blitsen til med å fryse motiv i fart.
Vel fokuspunkt/interessepunkt
Tenk over kva du tek bilete av! Kvifor synest du akkurat dette er verdt å forevige? Når du har funne ut kva som fascinerer deg i motivet, så konsentrer deg om akkurat det, og la det komme godt fram. Gå nærmare (sjå pkt. 1), slik at fokuspunktet ditt kjem tydeleg fram, og bruk "det gylne snitt" (sjå pkt. 5) for å oppnå ei harmonisk plassering i biletruta.
Ha "det gylne snittet" i tankane
"Det gylne snitt" er ein god tommelfingerregel når du skal plassere fokuspunktet ditt pent i biletet. Dette prinsippet for god komposisjon har vore nytta heilt sidan antikken og går i korte trekk ut på å dele biletflata inn i ni like ruter og plassere fokuspunktet i eit av krysningspunkta til linjene framfor å plassere det midt i biletet. Horisontar kan du leggje langs linjene.
Tenk på linjer og mønster
Mennesket søkjer naturleg etter orden og samanheng. Auget "elskar" mønster og gjentakingar, og vi leitar umedvite etter det. Utnytt det i bileta dine. Leit etter mønster, linjer, kurver og figurar som gjentek seg, og bruk dei i motiva dine.
Tenk på at du skal ha skarpe bilde
Gode bilete krev ei viss teknisk innsikt, slik at du kan bruke kameraet ditt best mogleg i ulike situasjonar. Nokre tips:
Fokusering
Fokusering vil seie at du lèt autofokus i kameraet få tid til å stille seg skarpt. Sikt med kameraet på fokuspunktet i biletet, og hald utløysarknappen halvvegs nede. No jobbar kameraet med å stille motivet skarpt. Det gir ofte frå seg eit lite pip når det er ferdig. Trykk så utløysarknappen heilt ned, og biletet blir eksponert.
Skarpe bilete
Årsaka til at vi får uskarpe bilete, er som oftast at vi beveger kameraet idet vi trykkjer på utløysaren. Tips for å unngå uskarpe bilete: Hald kameraet stødig.
Ei hand under er betre enn ei hand på kvar side av kameraet. Stativ kan vere lurt. Fotografer i godt lys (dagtid). Bruk blitsen.
Ver obs på lyset
Ordet fotografere stammar eigentleg frå latin og betyr "å teikne med lys". Det er ikkje tilfeldig. Lys og skugge er dei to tinga som gir liv til eit bilete. Lyset er svært avgjerande i dei fleste motiv, så ver obs på korleis lyset fell på motivet ditt.
Ta mange bilete
Ein av dei store fordelane med digitale kamera er at du kan ta mange bilete utan at det kostar noko. Utnytt det. Ta mange bilete frå ulike vinklar og med ulike utsnitt. Prøv noko nytt – du veit aldri når blinkskotet dukkar opp. Tek du mange bilete, blir du også flinkare til å ta bilete!
Ha alltid med deg kamera
Du veit aldri når motiva dukkar opp, men vi veit at dei sjeldan dukkar opp framfor PC-skjermen.
Slutt å lese, og kom deg ut!
