Kommunikasjon og kommunikasjonsformer

Ordet kommunikasjon kjem frå latin og betyr «å gere felles». Kort forklart går det ut på at individ utvekslar ein bodskap seg imellom ved hjelp av eit felles symbolsystem.

Måten vi kommuniserer på og kva for nokre kanalar vi kommuniserer gjennom, er i stadig endring. Vi kallar det for kommunikasjonsformer.

Menneske kan kommunisere verbalt eller ikkje-verbalt. Språket er eit verbalt symbolsystem som vi bruker når vi snakkar og skriv. Verbal kommunikasjon føreset at vi kjenner språkkodane til dei vi kommuniserer med, elles blir det vanskeleg.

Men vi kan òg kommunisere ikkje-verbalt ved hjelp av kroppsspråk og visuelle symbol. Gamle holemåleri fortel oss historier om korleis steinaldermenneska levde liva sine for fleire tusen år sidan. Som turistar bruker vi fingerspråk og ansiktsuttrykk til å kommunisere med menneske som ikkje snakkar same språket som oss.

• Personleg kommunikasjon er tovegskommunikasjon mellom to eller få personar, der deltakarane møtest ansikt til ansikt. Kommunikasjonen er privat og prega av direkte tilbakemeldingar.

• Personleg mediert kommunikasjon er ei blanding av privat og offentleg kommunikasjon ved hjelp av teknologiske medium. Deltakarane skiftar på å vere sendarar og mottakarar.

• Massekommunikasjon er kommunikasjon der éin sendar formidlar ein bodskap til mange mottakarar samtidig gjennom eit medium. Avsendaren er profesjonell, og mottakarane har avgrensa høve til å gi tilbakemelding.