Filmoppgåver: Det er lov å si nei
Sjå først kortfilmen Det er lov å si nei. Filmen varer i 14 minutt.
Det kan vere nyttig å reflektere litt over handlinga i filmen før du byrjar jobbe med oppgåvene:
Kva er det filmen ønsker å fortelje oss?
Er handlinga i filmen realistisk?
Beskriv kort kva som ligg i gruppepress. Kom gjerne med døme.
Kan du finne scener frå filmen der Jane, Simen eller nokon av dei andre blir utsette for gruppepress?
Kvifor trur du filmen har fått tittelen Det er lov å si nei? Grunngi svaret ditt.
Drøft denne påstanden: Mange ungdommar opplever i dag press forårsaka av sosiale medium, TV-seriar og klassemiljø.
Reflekter over kvifor Jane trur det er så viktig å ligge med Simen, sjølv om det er tydeleg at ho ikkje vil.
Kva trur du hadde skjedd med Janes sjølvkjensle dersom ho ikkje hadde følgt sine eigne grenser, men gitt etter for press.
Diskuter saman i klassen om det er ein samanheng mellom identiteten til ungdommar og sjølvkjensla deira.
Filmen Det er lov å si nei er skriven og regissert av filmskapar Aurora K. Nossen. Ho laga filmen som eit resultat av debatten rundt TV-serien Sigurd fåkke pult. Nossen opplevde tittelen på TV-serien som støytande og skreiv eit debattinnlegg om dette i Aftenposten.
Kva er det med tittelen Sigurd fåkke pult ho meiner er støytande, og kva argument har ho for at ein slik språkbruk degraderer jenter?
Er du einig eller ueinig med Nossen? Grunngi svaret ditt.
Tenk deg at du jobbar i ein ungdomsklubb der Jane, Simen og resten av ungdommane i filmen pleier å gå. Du snakkar ofte med ungdommane og oppdagar at det går føre seg skjult mobbing og gruppepress knytt til sex og festing.
Reflekter over korleis du kan snakke med ungdommane om desse temaa på ein god måte.
Lag eit forslag til eit dialogverktøy du kunne brukt i arbeidet på ungdomsklubben.