Fagartikkel
Automatsikringar
Ein automatsikring brukar vi til å beskytte den elektriske installasjonen vår. Automatsikringane løyser ut om det skulle gå meir straum i krinsen enn det han er berekna for. Han løyser ut på overstraum og kortslutningar.
Automatsikringer. Bilete: NTB Scanpix, Science Photo Library / CC BY-NC 4.0
Jordfeilautomat. Bilete: ABB / CC BY-NC-SA 4.0
Automatsikringar blir delte inn i forskjellige karakteristikkar. Nokre reagerer raskt og nokre seint. Dei vanlegaste karakteristikkane er A, B, C og D.
A er svært hurtige sikringar som kan brukast til dømes i samband med elektronikk.
B er middels hurtige sikringar som blir mykje brukte i alminnelege bygningsinstallasjonar til belysning, stikkontaktar, osv.
C er litt langsame sikringar. Desse blir til dømes brukte i samband med motorkrinsar, då det er vanleg at elektriske motorar gjerne kan trekkje litt overstraum ved oppstart.
D er ganske langsame automatsikringar som toler nokså store overstraumar over tid, før dei slår ut.
B og C er de to mest vanlege typane automatsikringar brukte i bustad.