Kva er formålet med turen?

Dersom passasjerane berre skal reise frå A til B, er formålet å komme fram til B. Då er passasjerane ikkje interesserte i mange stopp undervegs, dei vil gjerne komme fram raskt og på ein behageleg måte.

Er reisa kort, krevst det mindre komfort enn om reisa er lang, men opplysningar om reiseforløp og pårekna framkomst er viktig informasjon som passasjerane ønskjer og verdset. Det same gjeld annonsering av haldeplassar.

På lengre reiser vil passasjerane også setje pris på tilleggsgode som til dømes kaffi og aviser.

Når reisa er målet, må ein planleggje i endå større grad med tanke på opplevingar og trivsel. På ein slik tur blir det svært viktig å sørgje for ei god turoppleving og få sveisa gruppa saman sosialt:

• Det er vanlegvis ein fordel om det finst nokre ledige sete på bussen slik at passasjerane kan sirkulere.

• Også hyppige stopp kan bidra til at passasjerane raskare blir kjende med kvarandre.

• Sjåføren eller guiden bør gi god informasjon om attraksjonar under reisa.

Tenk gjennom kva du vil oppnå, og planlegg ut frå det.