Fagstoff

Vedlikehald av hydraulikkanlegg

Regelmessig vedlikehald og inspeksjon av hydraulikksystemet er viktig for å sikre påliteleg drift og for å forhindre uventa driftsstans. Både oljekvaliteten, slitasjen på komponentane og den generelle kapasiteten til systemet må overvakast.

Hydraulisk pumpestasjon med einingspumper, einingsventilar og termostat. Foto. — Her ser du eit hydraulikkaggregat. Kva vedlikehaldsbehov trur du eit slikt anlegg har? Bilete: Photographer Engineer / Avgrensa gjenbruk

Kvifor må hydraulikkanlegg haldast ved like?

For at eit hydraulikksystem skal vare lenger og yte betre, er det viktig at du overhaler både aggregatet og systemet regelmessig. Det betyr at du må demontere, inspisere, reingjere og byte ut slitne delar, før du set alt saman igjen og kontrollerer at alt fungerer som det skal. Slik får systemet "nytt liv" samtidig som du førebygger unødvendig slitasje og kostbar driftsstans.

Kor ofte eit hydraulikksystem bør overhalast, avheng mellom anna av temperaturen i systemet, kor mykje olja sirkulerer, og kor rein ho er. Eit anlegg som bruker mineral hydraulikkolje, ei olje som er framstilt av råolje, og har driftstemperatur på mellom 50 og 70 gradar, treng vanlegvis overhaling etter cirka tre år, eller omtrent 4–5 000 driftstimar.

Dersom du bruker ei biologisk nedbrytbar hydraulikkvæske, ei miljøvennleg olje som blir broten ned naturleg i naturen, kan levetida i mange tilfelle aukast opptil ti gonger, til rundt 40–50 000 timar, føresett at vedlikehaldet er godt og systemet blir halde tørt og reint.

Overhaling i seks trinn

Overhaling og levetidsforlenging på hydraulikkaggregat eller hydraulikksystem kan delast inn i seks steg:

1. Undersøk systemet

Før vi demonterer, kan vi måle lekkolja for å vurdere tilstanden til pumpa. Lekkolje er den olja som lek forbi tetningane i pumpa, og mengda gir god indikasjon på kor sliten ho er.

No registrerer vi òg driftstemperaturen. Han fortel om systemet har vore utsett for unormal belastning. Lekkasjar kan oppstå dersom slangar eller røyr har fått fysisk skade eller har vore utsette for for høg temperatur over tid.

Det er viktig å unngå lekkasjar, ikkje berre fordi olje går tapt, men òg fordi smuss og fukt kan trenge inn og skade kjenslevare komponentar.

2. Demonter og inspiser

Ta slitasjedelane på aggregatet frå kvarandre så du får vurdert tilstanden på dei. No er det viktig at du får gjort ein oljeanalyse. Det betyr at du må sende ein oljeprøve til eit laboratorium så dei kan teste om han inneheld metallpartiklar frå slitne delar, restar av pakningar eller vatn.

Resultatet av oljeprøveanalysen gir deg eit tydeleg bilete av kvar slitasjen skjer, og kva tiltak du bør setje inn for å auke driftstida på anlegget.

3. Reingjer

Når du har inspisert komponentane, reingjer du dei grundig for å fjerne smuss, rust og gamle belegg. Reins tanken innvendig, og byt alle filter regelmessig for å hindre at ureiningar spreier seg i systemet.

Eit hydraulikksystem har fleire filter med ulike funksjonar. Pustefilteret reinsar lufta som blir trekt inn, returfilteret reinsar olja på veg tilbake til tanken, det vassabsorberande filteret fjernar fukt, lekkoljefilteret tek seg av olje frå lekkasjemålingar, og trykkfilteret reinsar olja før ho går ut i systemet.

Finn du til dømes metallpartiklar i eitt av filtera, veit du at forureininga allereie har nådd tanken, og du må setje inn tiltak.

4. Skift ut slitne delar

Ei hydraulikkpumpe der den indre mekanikken er synleg. Biletet viser ein roterande aksel med lager, ein sylindrisk rotor med fleire kammer og dessutan tilkoplingar for væskeinntak og -uttak i fronten. Pumpehuset er delt i to fargar, raud og blå, for å gjere konstruksjonen tydeleg. Ein skrue er plassert på toppen. Illustrasjon. — Her ser du ei hydraulikkpumpe som er gjennomskoren. Kva slitasjedelar trur du ei slik pumpe har? Bilete: Lukas Beran / Avgrensa gjenbruk

Skift ut alle pakningar, ventilar og andre komponentar som har teikn til slitasje eller skade. No kan det òg passe å oppgradere systemet.

Overgang til biologisk nedbrytbar hydraulikkolje er betre for miljøet og kan bidra til å forlenge levetida på aggregatet. Eldre aggregat kan oppgraderast til eit meir miljøvennleg hydraulikkaggregat som Green HPU (Hydraulic Power Unit), som bruker mindre straum og gir lågare støynivå.

Du kan òg installere system for førebyggande vedlikehald. Det betyr at sensorar oppdagar feil før dei oppstår, og dermed unngår du ikkje-planlagd nedetid.

5. Testing og kalibrering

Etter at delane er bytte og systemet er sett saman igjen, må du gjennomføre testar for å forsikre deg om at alt fungerer slik det skal. Ein trykktest kontrollerer at systemet held trykket utan lekkasjar, mens ein funksjonstest sikrar at komponentane samarbeider som dei skal.

Juster trykk og oljestrøyming slik at systemet yter maksimalt.

6. Montering og sluttkontroll

Til slutt monterer du heile aggregatet ferdig, og gjer ein siste kvalitetskontroll for å forsikre deg om at alle komponentane fungerer som dei skal.

Små feil som du oppdagar her, kan førebygge store problem seinare.

Med grundig overhaling som følger desse seks stega, kan eit hydraulikksystem levere stabil og effektiv drift i mange år, samtidig som både driftskostnader og miljøpåverknad blir redusert.

Visste du dette om hydraulikkslangar?

Hydraulikkslangar har ei tilrådd levetid på fem år, men dei kan vare opptil 10–15 år under gode forhold. Rett driftstemperatur og romtemperatur er derfor vesentleg. Hugs regelmessig å inspisere og erstatte slangar som viser teikn på aldring eller skade.

Refleksjonsspørsmål

Kva er forskjellen på mineral hydraulikkolje og biologisk nedbrytbar væske?
Kvifor er reingjering av tank og filter så viktig i eit hydraulikksystem?
Korleis kan førebyggande vedlikehald spare både tid og pengar?